Vawiin khan Directorate of Science & Technology Conference Room-ah Mizoram Election E-Atlas Portal (website) chu Chief Electoral Officer (CEO) Pu SB. Shashank, IAS leh Aizawl DC Dr A. Muthamma, IAS  hova enchhinna (preview) neih a ni.  

Chief Electoral Officer, Pu SB. Shashank, IAS chuan Geographic Information System (GIS) thiamna hmanga  Mizoram Remote Sensing Application Centre (MIRSAC) leh North-Eastern Space Application Centre (NESAC) bultuma Mizoram Election E-Atlas Portal buatsaih a ni chu lawmawm a tih thu a sawi a. He website hmang hian felfai zawk leh rang zawka inthlan buatsaih leh kalpui theih a rin thu a sawi a. A changtlun lehzualna tura rawtna hrang hrang te a sawi bawk a ni.  

Aizawl DC Dr A. Muthamma, IAS  pawhin hetianga inthlanna atana thil tangkai tak tur buatsaih a ni ta chu thil lawmawm tak a ni, a ti a. Hei hian inthlan inbuatsaih leh inthlan ni atan kawngro thui tak a sut tur thu a sawi a. Inthlanna langtlang leh rintlak tak neih kawngah a puih a rin thu a sawi a ni.

Member Secretary, MIRSAC Dr. RK. Lallianthanga chuan Mizoram Election E-Atlas Portal (website) hi tunlai thiamna sang Geographic Information System (GIS) hmanga Mizoram Remote Sensing Application Centre (MIRSAC) leh North-Eastern Space Application Centre (NESAC) tangkawpin an buatsaih a nih thu a sawi a. Mizoram Directorate of Election-in hemi atana tul ang ang data te an pek thu a sawi bawk.

Pu R. Lalfamkima, Scientist, MIRSAC chuan web portal an siam dan leh a hman dan tlangpui official kalkhawmte chu a hrilhfiah a. Tunlai vansang thiamna hmang tangkaiin Mizoram chhunga Assembly constituency tina polling station building zawng zawng te bakah a kalpawh dan turte thlenga tihlan vek a nih thu a sawi a. Hei hian inthlan hmaa inbuatsaih lawk dan tur engemawchen a puih theih dawn avangin election officials leh election duty te tan a tangkai hle tur thu a sawi a, he web portal- ah hian module panga (5) awmin inthlan kaihhnawih thil hrang hrang a tih theih dawn thu leh vote thlak ni-a polling station tina darkar bi-a vote tlak dan zawng zawng pawh update leh en theih a nih tur thu a sawi bawk a ni.

Mizoram Election E-Atlas Portal (website) hi sawrkar official tana hman tura duan a ni a, GIS-base web portal a nih angin Mizorama polling station zawng zawngte an awmna geographical location (lat/long)-ah dah vek a ni. Hei bakah hian mipa leh hmeichhia voter awm zat te, khawi constituency-a awm nge tih te leh information dang—polling station atanga damdawi in hnai ber, police station hnai ber, petrol pump hnai ber  tih te bakah mobile phone signal awm leh awm loh te thlenga dah vek a ni a. He web portal hi tunah siam peih fel tep a ni tawh a, a nih dan tur la ni kim lo deuh mahse a tlangpui hi zawh a ni tawh a, chuvangin enchhinna hi neih a ni. Election E-Atlas hi a la famkim tawk lohna leh data dah belh ngai turte kalkhawmte’n an sawiho a. A hma thei ang bera heng rawtna hrang hrang te hi tipuitling tura hmalak ni se tiin rawtna an siam a ni.

He inkhawm hi Dr. RK. Lallianthanga, Member Secretary, MIRSAC-in a kaihruai a. He hunah hian Chief Electoral Officer hi Jt. CEO, Krishna Mohan Uppu, IAS in a tawiawm a. ICT leh NIC Department officials te bakah Directorate of Science & Technology-a officers leh MIRSAC Scientists te an tel a ni.