Vawiin khan New market Dawrpui ah Commerce & Industries Minister Pu H Rohluna’n Aizawl City Centre Annexe building sakna tur lung phumna hun a hmanga, Pu Zothan Khuma Secretary Commerce & Industreis, Pu J Hmingthanmawia, Director, Commerce & Industries department a thawktute leh Dawrpui khawtlang hruaituten he hun hi an hmanpui a ni.

Commerce & Industries Minister Pu H Rohluna chuan Aizawl City Centre Annexe building hi kan eitur hrang hrang zawrhna kawngah thianghlim zawk leh fai zawka kalpui a nihna tur atana hmalakna a ni, a ti a, Mizoram mipuite hriselna leh thianghlimna kawnga hmasawnna a nih ngei ka beisei a ni, a ti bawk. Pu H Rohluna chuan ACC Annexe building sak tur hi kan ram hmasawnna leh kan hriselna atan pawh a kan mamawh anih avangin building hlui thiah kawngah te, dawr sawn a ngaih hunahte pawh rilru inhawng taka he hmalakna hi dawngsawng turin a chah bawk.

ACC Annexe building hawnna hun hi Pu J Hmingthanmawia, Director, Department of Commerce & Industries in ka kaihruaia, Aizawl City Centre sakna tura hmalakna hrang hrang leh Annexe building sak dan turte a tarlang nghal bawk a ni.

Aizawl city centre (ACC) Annex hi sawrkar flagship programme NEDP hmanga sak tura ruahman a ni a, he project atan hian Cheng Nuai 3641.59 dah a ni. A sakna tur hmun hi Foreign Lane, Revenue Department building hmang tela sak tur a ni.

Building hi block hnih niin, A leh B ah then a ni a, Block A ah hian Basement I leh II a awm a, hei bakah hian Ground floor leh floor dang 4 a awm dawn bawk a ni. Block B ah hian basement I awmin, Ground floor bakah floor 5 a awm bawk ang. A pumpui (Plinth Area) zau zawng hi 1147.64 Sqm niin Floor area hi 7539.08 Sqm a ni. Building ah hian quarter 8 bakah Stall 100, Shops 108, Parking 324 awm thei tura ruahman a ni bawk. A building sakna tur hian Geotechnical Survey neih zawh tawh a ni a, a satu turte pawh thlan fel an ni tawh a ni.