1008/2024-2025

Aizawl, 28th June 2024: Aijal Club chuan vawiin tlai khan RB McCabe Hall, Aijal Club-ah Remna Thuthlung Ziah; (Signing of Mizoram Peace Accord) hriatrengna hun leh  lawmna programme an buatsaih a.  Governor Dr Hari Babu Kambhampati chuan Khuallian niin he hun hi a hmanpui a, thuchah a sawi nghal bawk.

Mizoram Peace Accord, 1986 hi India sawrkar leh Mizo National Front (MNF)-te  kara Inremna Thuthlung, Mizorama helna, Kum 1966 atanga intan tihtawpna a ni a. He Document hming hi Mizoram Accord, 1986: Memorandum of Settlement tih niin   June 30 khan Pu Laldenga, MNF President, Pu RD Pradhan, Union Home Secretary leh Pu Lalkhama, Chief Secretary, Government of Mizoram ten hming an ziah hnan  a ni.

Remna Thuthlung Ziah lawmna pual program-ah hian Governor Dr Hari Babu Kambhampati chuan state puma mipui zawng zawngte duhsakna chibai a buk a. Governor chuan he ni pawimawh tak hian Remna leh muanna, inpumkhatna leh hmasawnna kawnga ke pen kan duhna a ti chiang tih a sawi a. Remna Thuthlung Ziah Ni hi kan ram ropui tak chanchin ziahnaah hmun pawimawh a chang reng tawh a ni a ti.

Remna a awm theihna tur te leh Mizoram tana hmalam hun êng zawk siam tura remna kawnga thawktu zawng zawngte chungah Governor chuan lawmthu a sawi a.  Mizoram Peace Accord chu kan State tana beiseina eng leh midangte tan pawh, khawnvar anga chiang taka hmuh theih beiseina eng  leh entawn tur, Remna Thuthlung hlawhtling tluantling awm tlem te zing a mi a ni a ti. 

Governor chuan  Remna Thuthlung Ziah a nih theihna atana theihtawp chhuahtu te -  Pu Laldenga, Mizo National Front (MNF) Founder President, Mizote tana hruaitu nih tling, Pu Lal Thanhawla, Chief Minister, Remna a awm theihna atana a lalthutthleng thawhsan tu leh Pu Lalduhoma, Chief Minister ni lai, khatih hun laia  MNF leh India Sawrkar inkara palai hna pawimawh thawktu te an ngaihsan awm tih a sawi a. Pu Zoramthanga, Pu Ch. Chhunga leh Brig.  T. Sailo, Mizoram Chief Minister lo ni tawhte pawhin he Remna leh muanna hlu tak a lo awm  theih nan an thawh hlawk hle bawk tih a sawi a ni. 

Full Speech of Governor: https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-celebration-of-signing-of-mizoram-peace-accord-at-aijal-club-aizawl-on-28th-june-2024

He hunah hian Chief Minister Pu Lalduhoma pawhin Remna leh Muanna a lo awm theihna atana theihtawp lo chhuah tute inpekna chu a ropui a tih thu a sawi a. Mipuite tawngtaina Pathianin a chhang a, remna kan neih theih bakah he remna hi a tluantlinga kan vannei hle a ni, a ti. Kan hun tawn atang khan kan inzir fin a pawimawh a ni a tih a sawi a. Tunah chuan remna leh muanna duhtu kan nih angin India khua leh tui rinawm tak nih kan tum a pawimawh a. India ram hi khawvelah Minority te tana zawl dawh ber leh minority te ngaihven ber ram a ni a kan vannei tih a sawi. Chief Minister chuan  Remna leh Muanna chuan rah tha a chhuah thin a; hmasawnna leh changkanna te pawh nei tur chuan remna leh muanna hi nghet taka kan vawn tlat a ngai a ni a ti.

He lawmna programme hi Dr Renu Sharma, Chief Secretary leh President, The Aijal Club-in inlawmna thu sawi hmasa in tan a ni a.  A tir lamah  Mizoram Circa 1960 to 1990 tih video thlirho a ni.  Hemi hnu hian  Governor Dr Hari Babu Kambhampati  chuan Pu Laldenga (L), Mizoram Chief Minister hlui, Pu Lalkhama, IAS (Rtd), Signatory of  Mizoram Peace Accord, Pu Lal Thanhawla, Mizoram Chief Minister hlui, Pi Rothangi, Pu CH Chhunga (L), Mizoram Chief Minister hlui, Pu Brig.  T. Sailo (L) Chief Minister hlui, Pu Zoramthanga, Chief Minister hlui leh Pu Lalduhoma, Chief Minister te hnenah chawimawina thilpek a hlan a.  Program hi Pu Rin Sanga, Vice President, Aijal Club-in lawmthu sawiin a khar thung.