Vawiin khan Vanapa Hall-ah Civil Services Day hman niin Chief Minister Pu Zoramthanga chu khuallian a ni a. Kum danga la tih ngailoh, a vawikhatna ni turin Sawrkar hnathawk tha leh entawntlak thlan chhuahte hnenah ‘Chief Minister’s Award for Excellence in Public Administration’ chu Chief Minister hian a hlan a ni.

Chief Minister chuan Sawrkar hnathawkte chu ram sawrkarna ruangama ruhrel pui ber an ni a, ni khat an tello chuan ram inrelbawlna hian a buai phah vek thei a ni, tiin thahnemngaihna leh rinawmna nen thawk turin a chah. Pu Zoramthanga chuan talent ropui tak mihring te pek kan ni a, chu chu hman tangkai thiam chuan kan tih theih leh nih theih sang ber kan thleng thei ta thin a ni, a ti a. Chutiang bawk chuan ram pawh hian theihna potential tha tak a nei a. Mizoramin hmasawnna tura "asset" kan neih hlu tak tak - ram leilung tha, sik leh se leh ruahtui duhthusam, leilet ringawt pawh a chhunga cheng mipui chawm theihna ram kan neih malsawmnate hi kan hman tangkai thiam a ngai a; chu malsawmna ruai chu sawrkar hnathawkte hi "mipuite kil phak tura chawi hniamtu tur an ni," tiin Chief Minister chuan kan ngaihtuahna mindset kan thlak a ngaih thu a sawi a. Hmalak dan tur ruahmanna an siamin ram leh mipui tan eng hlawkna nge awm thei ang a, hmasawnna tluantling a thlen theih dan te ngaihven hmasak a tul thu a sawi bawk.

Vawiin Civil Services Day lawmna inkhawmah hian Assembly House Speaker Pu Lalrinliana Sailo, Deputy Speaker Pu Lalrinawma, Minister leh MLA te bakah AMC hotute leh Commission leh Board hrang hranga hotute an tel a. Khawtlang leh tlawmngai pawl hruaitute leh sawrkar hnathawkte an kalkhawm a ni .

Chief Secretary Pu Lalnunmawia Chuaungo chuan he day lawmna inkhawm hi a kaihruai a. Thu sawiin Chief Secretary chuan sawrkar hna thawk te chu hlawh neia rawih full time a hna thawk a, mipui te tana rawngbawl tur an nih thu leh sawrkar a an mawhphurhna tha taka an hlen chhuah chu Pathian rawng an bawlna chi khat a ni tih hre reng turin a chah a. Sawrkarin a mawhphurhna hlen chhuak tura hma a lakna ah sawrkar hnathawk te chauhvin an khawih theih thil tlem azawng a awm a, a tam ber erawh chu vantlang/ private enterprise tel theihna vek a ni," a ti a. A bik takin hmasawnna hna/ development work te phei hi chu sawrkar hna thawk ten direct a an khawih hi a fello in, a thawktu amahin a in monitor a, a in supervise bawk chuan hna tha tawk lo a tamin, corruption a ti hluar a ni, a ti. Chief Secretary chuan Mizoram ah thalai lehkha thiam tam tak hna nghet chelh lo an awm thu leh anni chu ram Ieh hnam tana asset ropui taka chher chhuah theih an nih avangin chumi atan chuan nasa zawka hma kan Iak a ngaih thu a sawi. Ram Ieh mipui te hmasawnna hna/ development works te hi ram changkang apiangah private sector te hmanga khawih tam a, ram changkang Io apiangah sawrkar hnathawk ten direct a an khawih tam a nih thu a sawi bawk. Civil Services Day lawmna inkhawm hi Pi Angela Zothanpuii, Joint Director, ATI in lawmthu sawiin a khar a ni.

 Sawrkar hnathawk tha leh entawntlak thlan chhuahte hnena ‘Chief Minister’s Award for Excellence in Public Administration’ hlan hi hlawm hnih – Organisation Category leh Team Category ah then a ni a. Category pahnihah hian a ti tha zual pakhatna leh pahnihna thlan chhuah an ni a. Organisation Category hnuaiah hian lawmman pakhatna dawngtu chu Planning and Programme Implementation Department an ni a. Anni hian Entrepreneurship Development Programme (EDP) Scheme hlawhtling taka an kalpui avangin he award hi an dawng a ni. Lawmman hian hian certificate leh sumfai cheng nuai thum a keng tel a ni.

Organisation Category a lawmman pahnihna dawngtute chu MIRSAC an ni a, Mizoram Infrastructure Information and Monitoring System an kalpui vanga dawng an ni. MIRSAC hian Geographical Information System (GIS) hmangin Mizoram district tin an tuam chhuak a, state chhung kilkhawr berah pawh sawrkar leh vantlang mipui hmun pawimawhte leh hmasawnna ruhrel kan neihte GIS hmang hian awlsam takin a hmuh zung zung theih a, a hmuna kal kher ngai lovin data pawimawh tam tak a lak khawm theih a ni. Certificate leh cheng nuai khat leh singnga an dawng a ni.

Team Category a lawmman pakhatna dawngtu chu Deputy Commissioner, Kolasib District niin an ni hian Vairengte leh Bairabi Counter-a hman tur ILP Software an duan chhuah vang a ni a. Lawmman dawngtu tura thlante hi Additional DC Laltanpuia Hnamte leh District Informatics Officer Raphael Herliana Hauzel te an ni. He software hmang hian counter-ah kal buai ngai lovin computer kaltlangin englai pawhin temporary ILP a dil theih a. Kolasib DC Office hian Revenue Collection-ah nasa takin hma an sawn phah a, kum kalta aiin cheng nuai 74 zetin an sum hmuh a pung a ni. Vawiin an lawmman dawn hian certificate leh pawisafai cheng nuai hnih a keng tel a ni.

Team Category a lawmman pahnihna dawngtute chu UD&PA Department an ni a, AMRUT scheme tha taka a kalpui vanga dawng a ni. Lawmman pahnihna latute hi mi pasarih an awm a, chungte chu Dr. C.Vanlalramsanga, Secretary, UD&PA; Dr H.Lalthlangliana, Municipal Commissioner, AMC; Pi Lalbiaknikimi, EE, Sewarage and Drainage Division, Aizawl East; Pi Helen Rodingliani, EE, Aizawl Water Distribution Division; Pi Deborah Lalawmpuii, Municipal Finance Specialist; Pi Lalmuanpuii, Capacity Building Specialist leh Pi Annie Zohmangaihi, Urban Infrastructure Specialist te an ni. AMRUT scheme in a tum ber chu khawpuia chengte mamawh zualpui - tui, eng, inkalpawhna kawng, khawpui cheimawina leh mamawh dangte siam a ni. AMRUT kalpui tha te hnena pek thin sumfai lawmman kum 3 chhung a zawnin Mizoram hian a dawng tawh a, Mizoram hi hmarchhak state zingah a dawng thei hmasa ber leh awm chhun kan ni. India ram puma AMRUT kalpui tha thlan chhuahah Mizoram hi pathumna a ni bawk. UD&PA Department hian an thawh that vang hian certificate leh cheng nuai khat leh singhnih sangnga an dawng a ni.