Vawiin khan Mizoram District dangte rualin Lunglei Convention Centre ah Civil Services Day 2019 pualin hun hman a ni. He hunah hian Lunglei khawpui chhunga sawrkar Department leh institution a hnathawkte, MJA hruaitute leh tlawmngai pawl hrang hrang aiawh mi thahnem tak an kalkhawm.

He hun kaihruaitu Pi C. Lalremruati, Lunglei DIPRO chuan Civil Services Day hmang tura kalkhawm zawng zawngte chungah lawmthu sawiin ram hmasawnna tura theihtawp chhuah tura in hlan thar theuh turin kalkhawmte a sawm a ni.

Pi Lalchhanhimi SDC Lunglei chuan powerpoint presentation hmangin Civil Services Day hman tan a nih dan leh a chanchin tlangpui sawifiahna hun a hmang a. Civil Services Day chu sawrkar hnathawk ten mipui tana rawngbawlna hna tha leh zual zawka an thawh theihna tur atana inhlantharna ni ah hman thin anih thu sawiin India ram pumah kumtin April ni 21-a urhsun taka hman thin a nih thu a sawi a. Kuminah erawh April 21 hi Sunday a nih avangin a lawm hun hi sawn hlat a ni, a ti. Pu Lalnundika SDO (S) Lunglei in lawmthu sawina hun a hmang bawk.

Civil Services Day hi Mizoramah kum 2016 atanga hman tan a ni a. Ram puma hman hmasakna ber chu kum 2006 khan New Delhi-a, Vigyan Bhawan-ah hman a ni a. India ramin zalenna a neih hnua Home Minister hmasa ber Sardar Vallabhbhai Patela’n Administrative Services Officer, probationers-te puala Metcalf House, Delhi-a kum 1947 April Ni 21-a a thusawi pualin mipuite rawngbawl tura inhlanthar lehna atan he ni hi hman thin a ni. He hunah hian Chief Minister’s Award for Excellence in Public Administration lawmman dawngtute chanchin leh an hmalakna tlangpui te tarlan a ni bawk. He Award hi Mizorama a vawikhatna atan kuminah sem niin Category pahnih – Organisation Category leh Team Category ah lawmman sem a ni a. Chief Minister’s Award for Excellence in Public Administration hi vawiin khan Mizoram Chief Minister Pu Zoramthanga’n Vanapa Hall-a Civil Services Day 2019 lawmna programne ah a sem a ni.

ORGANISATION CATEGORY

1ST Prize – “Entrepreneurship Development Scheme” implemented by Planning & Programme Implementation Department (Rs 3, 00,000/- + Certificate)

2ND PRIZE - “Mizoram Infrastructure Information & Monitoring System” implemented by Mizoram Remote Sensing Application Centre (MIRSAC) (Rs.1, 50,000/- + Certificate)

TEAM CATEGORY

1ST PRIZE - “Introduction of Temporary ILP Software at Vairengte and Bairabi ILP Counters” under Deputy Commissioner, Kolasib District (Rs.2, 00,000/- + Certificate)

2ND PRIZE - “Implementation of Atal Mission for Urban Rejuvenation (AMRUT)” implemented by UD&PA Department (Rs. 1, 25,000/- + Certificate)