No.4116/2020-2021

Aizawl the 15th August, 2020: Independence Day vawi 74 chu vawiin khan India ram hmun dangte rualin Mizoram dung leh vangah pawh lawm a ni a. Mizoram chhunga Independence Day lawmna programme lian ber chu Aizawlah tukin zing dar 8 khan Sipai Lammualah neih niin, Chief Minister Pu Zoramthanga chu khuallian a ni.

Novel Coronavirus hripui leng avangin sawrkar laipui chuan he ni pual hian fimkhurna tur inkhaihhruaina hrang hrangte vawng reng chunga programme buatsaih turin state tin a chah a. Chumi zulzui chuan he hri leng laka mipui him tlan theihna turin sawrkar chuan ruahmanna a siam a. Kum dang angin parade contingents awm lovin, mipui mimir leh school naupang te pawh sawm theih an ni lova. Amaherawhchu, heng programme te hi Mizoram hmun tina an lo thlir theih turin TV kaltlanga live-a pekchhuah reng a ni dawn a ni. Lammual programme-ah hian sawrkar hnathawkah pawh department director leh a tlukpui chin chunglam chauh sawm an ni a. Guard of honour pe tur armed forces contingent 5 (3rd bn. MAP, 46 Assam Rifles, 90 Bn BSF, Mizoram Home Guards, 5th IR Bn) leh Band Party pakhat (1st Bn. MAP Brass Band) an tel a ni.

Chief Minister Pu Zoramthanga chuan Mizoram mipui te, ram chhung leh ram pawna India khua leh tui zawng zawngte Independence Day chibai a buk a. Independence Day kan hman mek lai hian kan beisei loh lam atangin min runtu hripui hlauhawm chuan ram pum a tuam mek thu sawiin, kan him tlanna tura inkaihhruaina dan te leh mi thiamte thurawn ngai pawimawh a, kan zawm tlat chuan he hripui lakah pawh kan him zel ang tih a beisei tlat thu a sawi a. "Lirnghing, ruahpui, lei min leh tuilianin India ram hmun hrang hrangah harsatna a thlen a; Mizoram pawh kan bang chuang lo. Khuarel chhiatna avanga in leh lo leh rohlu chan te; nunna hial chantate ka tawrhpui tak meuh a. Sawrkar laipui, state sawrkar leh pawl hrang hrangin heng kan harsatna tawh mek te sukiang tur hian theihtawp an chhuah reng a ni," a ti.

Chief Minister chuan a hnuai ami ang hian Independence Day pual thuchah a sawi chhunzawm a ni:

March ni 11, 2020 khan WHO chuan COVID-19 hi khawvel pum dap chhuak hripui (pandemic)-ah a puang a. Sawrkar chuan he hripui laka kan him theih nan rang takin hma a la nghal a, State Level Task Force din nghalin District Level Task Force leh Village/Local Level Task Force on COVID-19 pawh ram pumah din zui nghal a ni. He hripui kaihhnawiha kawng hrang hranga hna thawk tur Task Group engemawzat Sawrkar chuan a din bawk a.

Mizoram chu India ram state te zingah COVID-19 avanga inkharkhip (lockdown) puang hmasa ber te zinga mi niin rampum huap lockdown puan hmain Mizoram sawrkar chuan a puang a. Disaster Management Act, 2005 tlawhchhanin hrikai leh pudarh thei mihring an lo luh loh nan Mizoram luhka zawng zawng leh Lengpui Airport te chu ni March ni 23, 2020 khan khar nghal a ni.

Mizoram Sawrkar chuan COVID-19 natna vei lanchhuahna pakhat - khawsik en chu rang takin Lengpui Airport bakah State leh International boundary (ramri) luhkaahte a kalpui nghal a. Lengpui Airport chu India rama airport-te zingah COVID-19 screening kalpui thei hmasa ber te zinga mi a ni.

Hrikai rinhlelhte dah hranna tur leh lockdown avanga Mizoram mi leh sa ram danga tangkhang mi 15,600 zet rawn haw turte dahna tur (quarantine facility) district hrang hrangah ruahman nghal a ni a. Sawrkar mai ni lo kohhrante pawhin an hmunte quarantine centre atan phal taka an hman tir bakah centre-a awm te ei leh in tur thlengin kohhran engemawzatin an tumsak a. Kohhrante inpekna bakah he hripui do tura mi tlawmngai sang tel teh meuh Village leh Local Level Task Force kaltlanga penchhuak te an chhuanawm takzet a ni.

Chief Minister’s Relief Fund-ah COVID-19 hrileng do na kawnga sawrkar tha tichak turin mi inphal leh thahnemngaite – mimal, pawl, kohhran leh sawrkar hnathawk pawl hrang hrangten sum an rawn chhunglut a. CM Relief Fund hi Council of Ministers thukhawm chuan ngun taka a ngaihtuah hnu ah COVID hrileng dona atana senso phuhruk na atan hman turin a rel a. Heihi tun thlenga tangkai taka la hman zel a ni.

COVID-19 hripui avanga harsatna namen lo kan tawh laiin June ni 21 atangin lirnghingin Mizoram vawi tam tak a sâwi a, a na ber phei chu Richter scale-a 5.8 magnitude niin a epicentre pawh Mizoram chhungah a awm a ni. Heng lirnghingte avang hian Champhai district chhungah nasa takin chhiatna a thlenga, nunna chan awm lo mahse, chenna in 283 leh thil hlu tam tak a chhia a. Heng thil chhiate hlut zawng belhkhawm hi cheng nuai 316.35 ang vela chhut a ni.

Lirnghing avang hian DDMA hnuaia Emergency Operation Centre hrang hrangte chhun zan zawma duty tir an ni a, chhiatna thlen thulha chechhuak thei turin an hmanraw neih ang angte pawh inring renga dah lawk tura hriattir an ni. CYMA-te kutah pawh July ni 22, 2020 khan rikrum thila hmantur Bolero Camper leh Search & Rescue equipment thahnem tak pek an ni.

Mizoram hmasawnna turin Socio-Economic Development Policy (SEDP) chu hlawhtling taka kalpui kan tum a. Hei hian hmasawnna ki peng pawimawh tin hawlkimin, Mizoram chu state intodelh, a rama cheng mipuite khawsak changkang leh khawtlang nun nuam a siam dawn a ni.

SEDP kalpuina turin kum 2019-2020 sawrkar kum chhung khan budget pumpui cheng vaibelchhe 750 atangin cheng vaibelchhe 561.62 chu Department hrang hrangah sem a ni a. Hripui lengin harsatna namenlo a siamsak chung pawhin he policy hlawhtlinna tur hian SEDP Board ten chawl lovin hna an thawk a ni.

State Flagship Programme SEDP hnuaiah hian Agriculture Department chuan ei leh bar tharchhuah tihpun kawngah ruahmanna a siam a. Vaimim, arhar, bekang, field pea leh rajma chin chu uar taka kalpui a ni.

Horticulture Department chuan Lengpui leh Hmunpui khuaah te Model Bamboo Plantation a siam a, hemi hnuaiah hian hamthatna dawngtu mi 209 an awm a. Tunah hian mau tiak 79,000 phun tawh a ni. Kumin hian a hunbi pangngai lo (off season)-ah tomato quintal 4,050 vel zet tharchhuah a ni a, heta tang hian hlawkna cheng nuai 200 hu vel zet hmuhchhuah a nih piahlamah inhlawhfakna (hna) engemawzat a siam belh bawk. A hunbi pangngai lova tharchhuah zikhlum atangin loneituten cheng nuai 238 hu vel zet an lei bawk a ni. COVID-19 avanga inkhuahkhirhna khauh taka kalpui a nih chhungin Horticulture Department, Commerce & Industries leh MIZOFED chu Sawrkar din Vegetable and Fruit Supply Chain mawhphurtu an ni a. Lockdown hunlaia thlai leh thei hralhchhuah leh dehral zat hlutna hi cheng vaibelchhe 6.66 vel a ni. Lockdown khauh taka kalpui a nih chhung khan he supply chain avang hian mipui mimirin thlai leh thei ei tur an neih theih phah a, loneitute pawhin an tharchhuahte sumah an chantir thei a ni.

Sangha khawia eizawngte harsatna sukiang turin Fisheries Department chuan common carp sangha chi nuai 50.12 zet chu 50% subsidy in a sem a. Hei bakah pawh hian hma kawng tinreng ah nasa taka lak mek a ni bawk a ni.

Sawrkar laipuia Ministry of Textiles in Sericulture project lian a kalpui thar pali zingah Mamit Aspirational District chu Eri-Sericulture tihhmasawnna atana thlan a ni a, project cost hi cheng vaibelchhe 11.56 niin beneficiary 500 an awm a, tunah hian chak taka hma lak mek a ni.

Kumin han thlirlet pawhin vawiin ni thlenga dan bawhchhiatna lian tham sawi tur a awmlo hi kan police te hnathawh thatzia tarlangtu pawimawh tak a ni. Ramchhunga COVID-19 hripui a len vanga kan inkharkhip chinah he hripui hi a darh loh nan kan police ten thapui an chhuah a, tunah pawh hian kan police mi 3,000 vel lai chu tha thlah lovin COVID-19 kaihhnawih hna pawimawh chi hrang hrang ramri ven, contact tracing, quarantine facility hrang hrang venhim te an thawk mek a, inkharkhip chhunga inkaihhruaina dan hrang hrangte zawm a nih theih nan rim takin an thawk reng bawk a ni.

Ministry of Home Affairs chuan ramchhunga state police thawk tha 6 a thlan zingah Mizoram Police pawh an tel a, cheng vaibelchhe 25.81 lai mai Modernisation of Police atan min rawn pek phah a ni.

Inkalpawhna kawngpui hi hmasawnna hnukpui pakhat a nih avangin kan sum neih ang angte a theih chin chinah kawng siamna leh thawm thatna atan Public Works Department hman turin ruahman a ni a. Kum kalta chhung khan kilometre 452 lai a thui kawng laih a ni a, kilometer 330.96 a thui alkatra a luan niin, cement concrete pavement kilometer 87.920 a thui siam a ni a, kilometre 607 lai a thui kawng thawm that a ni bawk. COVID-19 hripui leng vanga kawng siamna project hrang hrang thawh chhunzawm a harsat mek laiin kan theih ang angin leh a remchan dan dap chung zelin hnathawh chhunzawm zel a ni.

Myanmar nen kan inkalpawhna tur hi sawrkar chuan a ngai pawimawh em em a, Chhimtuipui leh Tiau lui kan theihna tur lei tunah hian ruahman mek a ni a. Sawrkar laipui pawhin he ruahmanna hi min pawm sak tawhin Myanmar nen kan inkalpawhna tur kawngpui pali siamna tur pawh sawrkar laipui pawmpui turin thawn mek a ni a, hetih lai hian NEC chuan Myanmar nen kan inkalpawhna tur kawngpui pakhat siamna tur min pawm sak tawh nghe nghe a ni.

Power & Electricity Department chuan kum 2019-2020 Zuangtui Sub-Station 132kV a tihlen hna a thawk zo hman a, Aibawk – Sialsuk 33kV tower line, Phullen bula Tuiriza leh Hrianghmun bula Tuiching hmuna 100kW Micro Hydel Projects kan zo fel ve ve bawk a ni.

Public Health Engineering Department chuan kum 2019-2020 chhungin Jal Jeevan Mission (JJM) hnuaiah khaw hrang hrang 228 a in 15,941 ah tui herh haw theihin a siam a. Swachh Bharat Mission (Gramin) hnuaiah hian National Highway paltlang khaw hrang hrangah vantlang inthiarna 313 sak zawh a ni bawk. Hmun hrang hrangah bawlhhlawh paihna 169 sak niin, plastic leh bottle lakkhawmna hmun 308 sak zawh niin plastic bailing machine 6 lei a ni bawk.

India rama state tenau zingah Mizoram chu hriselna kawnga hma la tha ber kan ni hi chhuanawm ka ti a. Ministry of DoNER pawhin North East Special Infrastructure Development Scheme kaltlangin COVID-19 do nan cheng nuai 1,616.26 min pe a ni.

Aizawl Civil Hospital thli leh hnawmhnawk senghawina atan cheng nuai 50 sengin Bio-Digester 2 sak zawh a ni a. Zemabawk Cancer Hospital-a Cobalt Therapy Unit tih changtlun nan hmanraw tunlai leh changkang lei niin bun fel tawh a ni. Ministry of Health & Family Welfare ruahmanna kaltlangin Aizawl Civil Hospital, Lunglei Civil Hospital, Siaha, Lawngtlai, Serchhip, Champhai leh Kolasib District Hospital-ah te Trauma Centre sa tura hmalak mek a ni bawk a. Sawrkar laipuiin sum min pek bakah Mizoram sawrkarin Aizawl Civil Hospital Trauma Centre sak nan cheng nuai 450, Lunglei Civil Hospital Trauma Centre sak nan cheng nuai 300 a ruahman belh bawk a ni.

Kum 2019-2020 chhung khan Revenue Department chuan State’s Own Tax hnuaiah Rs. 7,24,00,620 khawn khawmin, State’s Own Non-Tax Revenue hnuaia tlingkhawm chu Rs. 1,56,15,939 a ni. Survey, allotment leh settlement of land kalphung awlsam zawk nan leh ram inchuh chinfel chungchangah chhiahchawitute tana phurrit awm thin chhawk zangkhai turin ‘The Mizoram (Land Revenue) Act, 2013’ leh ‘The Mizoram (Land Revenue) Rules, 2013’ te chu siamthat a ni.

Ministry of Panchayati Raj puihnain Local Administration Department chuan Rashtriya Gram Swaraj Abhiyan chu a kalpui a. Kum 2020-21 chhung hian Mizoram tan RGSA hnuaiah hian cheng vaibelchhe 13.585 sanction a ni. Finance Ministry chuan Sixth Schedule Area pawn khua Village Council te tan cheng vaibelchhe 16.24 pe chhuak in, Autonomous District Council Area pathum chhunga Village Council te tan cheng vaibelchhe 93 a lo sanction tawh a. 15th Finance Commission Grant a untied fund awm atangin first instalment cheng vaibelchhe 23.25 chu Finance Ministry chuan June ni 17, 2020 khan a lo release tawh bawk.

Tourism Department chuan FAI CAT II International Paragliding Accuracy Championship 2020 chu Serchhip ah India rama a vawi khat nan hlawhtling takin a buatsaih a. Kumin khan Bung Bangla a State Institute of Hotel Management sak te, Reiek a Adventure Theme Park leh ‘Zokhua’ sak hna te chu zawh a ni bawk. Central Swadesh Darshan Scheme hnuaia Thenzawl Golf Course siam hna chu zawhfel tawh a ni a. Thenzawl Golf Course hi Ministry of Tourism, Government of India bultuma sak awmchhun a ni nghe nghe a, hawn a ni tawh bawk.

Taxation Department in kum 2020-21 (June 2020 thleng) a SGST leh IGST, Professional Tax, MVAT, etc atanga chhiah a khawn tlingkhawm chu cheng nuai 9,790.05 a ni. Sum hloh a awm loh nan department chuan Vairengte Check-Gate ah Data Collection Centre a dah bawk.

Kum 2019-2020 chhung khan Transport Department a chhiah tlingkhawm chu a vaiin cheng nuai 4945.84 a ni a. Kum 2019-2020 chhung khan DTO office pakua ah lirthei 31,753 register niin Driving License 12,833 pekchhuah a ni bawk.

Social Welfare & Tribal Affairs Department hnuaiah ruihhlo ngaite enkawlna tur mi 1,000 awm theihna Jordan Rehabilitation Centre siam turin SEDP hnuaiah cheng nuai 920.27 ruahman niin hna thawh mek a ni bawk.

Urban Development & Poverty Alleviation department chuan PAHOSS (Parking House Support Scheme) hnuaia a hmalakna chhunzawm zelin, kumin May thla thleng khan puihna dawng tur beneficiary 313 thlan a ni tawh a ni.

Rural Development Department hnuaiah ni 100 inhlawhna MGNREGS hnuaiah kum 2019-20 chhung khan chhungkua 2,00,150 te chu inhlawhna siamsak a nih bakah inhlawhna rate chu cheng 211 atangin cheng 225 ah san a ni. Tun kum kal mekah hian ni 47 inhlawhna chu chhungkua 2,00,793 te tan siamsak ni tawhin, an hlawh pawh tihkhawtlai lovin July thla thleng pek vek a ni tawh.

Kum 2019-2020 chhung khan Directorate of Labour, Employment, Skill Development & Entrepreneurship chuan mi 29,891 chu Building & Other Construction Workers Welfare Board hnuaiah a ziaklut a. COVID-19 hrileng avanga member eizawnna lama harsatna tawkte puih nan cheng 3000 theuh, a vaiin cheng vaibelchhe 21.29 chu Board hian a pe bawk a ni.

Food, Civil Supplies & Consumer Affairs Department chuan Public Distribution System hnuaiah chhungkaw 2,72,315 a enkawl a, a lu nunga chhiarin mi 12,40,308 zet an awm a ni. Fur laia buhfai kan tlakchham loh nan hmun kilkhawr leh tlawhpawh harsa tur ni a kan hriatte chawmtu kudam 54 ah buhfai fur chhung daih tur chhekkhawl vek a ni a.

Sports & Youth Services Department hmalaknain kan infiam mite vawrh chhuak turin Mizoram Sports Policy hmasa ber pawh kalpui tan a ni a.

Cooperation Department hnuaiah SEDP kaltlanga Dawrpui, Aizawla Mizoram State Cooperative Union (MSCU) Training Centre sak mek chu zawh fel tep a ni tawh a. Tun hnai lawk khan, MIZOFED Ltd. chuan Horticulture Department nen tang kawpin Delhi-ah a enchhin nan Mizoram tharchhuah dragon fruit eng emaw zat an thawn thla a. ‘Pradhan Mantri Van Dhan Yojana’ Scheme hnuaiah, Van Dhan Vikas Kendra 44 din niin, a bul tan nan cheng nuai 581.55 pek chhuah (sanction) a ni. Van Dhan Mission hi hun rei lo teah Mizoram mipui nuai 2 velin an chhawr tangkai tura beisei a ni.

Commerce & Industries Department chuan state chhung hmun hrang hrangah bazar hmun 220 sa tawhin, checkgate hmun 3 - Vairengte, Kanhmun leh Bairabi te an vil mek a. Heng market leh checkgate atanga sawrkarin sum a hmuh (state revenue) chu kum 2019-2020 chhung khan cheng nuai 306.15 a ni.

COVID-19 hri leng dona kawngah, Mizoram sawrkar chuan Committee on Promotion of Locally Manufactured Protective Gears dinin, chumi hnuaiah chuan tualchhung designer leh puanthui mi 4000 velin hmai tuamna (mask) thui, sem darh leh hralh hna an thawk mup mup a. Heng mask-te hi WHO leh MoH&FW-in a pawm ang thlapa thui niin, a tul anga tihthianghlim (disinfect) vek zel a ni.

Information & Public Relations Department chu COVID-19 hripui leng dona kawngah a tir atangin a hmatawngah an tang a. Hemi kawngah hian, Department-in social media account a neihte chu mipuite hnena COVID-19 chungchanga hriat tur pawimawh hrang hrang hriattir nan te, thuthang dik lo leh ngaihdan dik tawk lo chi hrang hrang hai lan a, a dik zawk puanzar kawngah te a tangkai tak zet a ni.

Thian duh takte u, kan state hi hma lam panpui satliah mai lovin, thlak danglam a, rahbi thara chuan kaipui turin theih tawp kan chhuah leh zual a tul a, sawrkar leh mipuite chu phei khai rual taka kan thawh ho a ngai tak zet a ni.

Khawvel pumin a buaipui COVID-19 hri leng kan hmachhawn lai hian kut kuangkuaha lo thu veng veng thei kan ni lo va, kan zavai hian inralring reng leh fimkhur taka kan awm tlat a pawimawh a ni. Kan hun tawn chhoh zel turah, thil pawimawh hmasa leh loh theih loh thil - hriselna, ei bar zawnna, zirna, ei leh in leh ni tin mamawh bungrua, inkal pawhna kawngpui leh venhimna lam te ngaihtuah hmasak a pawimawh hle dawn a. Hengte hi chipchiar taka sawi sen a ni rih lo va, mahse, hemi atan hian lungrual taka kan thawh ho a tul dawn a ni.

COVID-19 hripui leng do kawnga tun thlenga theihtawp chhuahtu sawrkar hnathawk te, Village/Local Task Force, kohhran leh tlawmngai pawlte, police leh sipai te chungah lawmthu kan sawi a. He hun khirh tak kan tawn laia a ral hmatawnga awm - kan damlo enkawltute, sample la a fehchhuak thinte leh laboratory hrang hranga rim taka chawlh pawh nei lova sample test hna thawktute leh COVID-19 Volunteer te chungah a bik takin Zoram mipuiin lawmthu kan sawi a. Mipui kan him tlan theihna tura CM Relief Fund-a phal taka sum thawhtu zawng zawngte hnenah lawmthu ka sawi tak meuh bawk a ni.

Mizoram NGO, kohhran leh mipuite chungah kan sawrkara rinna in nghah tlat avang leh min thawhpuina avangin lawm thu ka sawi a. Vawiin hian, zalenna sualtu mi huaisen leh kan ram siamtute hmathlir chawi nung a, vawng him a, tipuitling zel turin inhlan thar leh ila, an thisen leh thlantui a thlawnin i luan raltir lo ang u. Khawvel pum thlirin, inrikrapna leh indo thuthang te, ralmuan lohna chi hrang hrang kan hria a, Mizoram hmasawnna bakah, remna leh muanna vawng nung zel turin rim tak leh huaisen takin hna i thawk zel ang u.

Vawiin Independence Day lawmna ah hian award hrang hrang puan leh sem a ni a. Chung te chu a hnuai a mi ang hi a ni:

I. National Award dawng tura Mizoram Police thlanchhuah te (anni hi nimin a Union Home Ministry in a puan a ni)
a) President's Medal for Distinguished Service - Pu C. Lalthanmawia, MPS, Director, Fire & Emergency Services
b) Police Medal for Meritorius Service - Pu C. Lalruaia, MPS, SP Aizawl leh Pu Lalthakima, Inspector, Police Training School

II. Huaisen lawmman (Jeevan Raksha Padak award series):
1) Sarvottam Jeevan Rakhsha Padak - Pu Lalrempuia (L),Vanbawng (April ni 5, 2019-a a fapa tui tla a chhanchhuahna lamah a nunna hlu tak a chan ta a ni)
2) Uttam Jeevan Raksha Padak - Pu C.Lianhawla, Tuidam (May ni 15, 2019 khan a nupui nen loa an feh laiin savawmin a nupui chu a bei ta thut mai a. Hmanraw dang chelek engmah nei lovin chemtum nen a bei let a, a nupui chu he savawm hlauhawm tak lak ata hi a chhanhim a ni.)
3) Jeevan Raksha Padak - Pu Lalawmpuia, North Serzawl (June ni 26, 2019 khan Pu Lalawmpuiate chenna in hi vanduaithlak takin a kang a. An chhungkaw member 6, kang hlum mai thei tur dinhmuna ding te chu a chhanchhuak a ni.)

III. President's Police Medal for Distinguished Service - Pu LR Dingliana Sailo, IPS, CID (CRIME)

IV. Police Medal for Meritorious Service:
1) Pu Laldawngliana, MPS, Secretary to the Govt. of Mizoram, Printing and Stationery
2) Pu Lalthafamkima Jongte, MPS, AIG (Operations)
3) SI Lalmanliana, Siaha DEF

V. Governor’s Gold Medal:
1) Sub Inspector Lalthanpuii, Aizawl DEF
2) ASI PC Laltanpuia, Aizawl DEF
3) Fireman Zonunthara, Bawngkawn Fire Station

VI. Governor’s Silver medal:
1) SI K.Lalrinpuia, Aizawl DEF
2) Hav.Ralngamthanga, 2nd Bn. MAP
3) Constable Lalthlamuana, Traffic Unit

VII. Mizoram State Teachers’ Award, 2020:
1) High School section - Pi Vanlalhliri Sailo, Headmistress, Govt. Hnahthial High School, Hnahthial
2) Middle School Section - Pu Malsawma Sailo, Headmaster, Govt. Garden Middle School, Rahsi Veng, Lunglei
3) Primary School Section - Pu R.Lalpianthanga, Teacher, Govt. Chawnpui Primary School Aizawl

VIII. Chief Minister’s Excellence Award in Public Administration, 2020:
(a) Organization category -
1) Deputy Commisioner’s Office, Siaha District (an hmalakna “Kawng kawhhmuhtu – Our children, our future” avanga hlan an ni)
2) Aizawl Municipal Corporation (AMC online building plan approval system avangin hlan an ni)

(b) Team category - Ajiveeka Grameen Express Yojana hmalakna an kalpui that avangin Pi H. Lalchhandami, CEO, MZSRLM; Er. Lalrammawia, Director, Transport Department, Pu C lalbiakthanga, Jt. Director (STA) leh Dr F.Laldinthara, State Mission Manager te thlan an ni.

(c) Individual Category -
1) Pi Shashanka Ala, IAS, DC Lawngtlai (Kan sikul, kan huan..my school, my farm hmalakna thar tha taka a kalpui avangin)
2) Pu Lalrinawma Khiangte, BDO Phullen, Saitual District (Water Supply Project from Paite Tuikawr to BDO Complex including installation of solar pump)