No.4115/2020-2021

Vawiin khan Tourism Minister Pu Robert Romawia Royte chu 74th Independence Day Lawmna, Thenzawl, SDC (C) Office-ah khuallian a ni. Independence Day Lawmna-ah hian Hnam puanzar pawh pharh a ni a, national anthem play a ni bawk.

Khuallian Pu Robert Romawia Royte chuan India ram zalenna champha, Independence Day ni ropui tak lawm tura lo kal khawmte, Mizoram mipuite leh khawvel hmun hrang hranga Zo hnahthlak zawng zawngte chibai a buk a. Vawiinah hian India ramin zalenna a neih theihna tura nunna hlu tak hlantute leh sul lo sua, ram inrelbawlna fel tak nei tura tha lo thawhtute zawng zawng chungah zahna chibai a hlan thar leh a ni. Khuallian chuan kan hriat theuh angin kumin March thla atangin hripui Coronavirus (Covid-19)-in khawvel a tuam mek a, mi nuai 8 dawn laiin nunna an chan tawh a, India ram pawh hripui kai tam ram pathumnaah hial kan awm mek a; chutih laiin Mizoram erawh Pathian venna leh kan sawrkar hmalakna zarah hripui avanga nunna chan la awm lohna State awm chhun kan la ni a, a lawmawm takzet a ni, a ti a. Hripui laka kan him theihna tura kawng hrang hranga hma laa, tha thawh a, mahni hreawm pawisa lova - sawrkar hnathawk, tlawmngai pawl hrang hrang, kohhran leh khawtlang hruaitute leh mipuite chungah lawmthu. Tha thlah lova tan la zui zel turin ka sawm thar leh a ni. Thenzawl khua pawh chhim lam nena inkal pawhna kawng pawimawh tak paltlang khua a ni a, chuti chung chuan hripui laka invenna kawngah a thawh hlawk leh thawk tha berte zingah chhiar ngam a ni a, chuvangin, Thenzawl leh a chhehvel khuate thawhrimnaah sawrkar aiawhin lawmthu a sawi a ni.

Khuallian chuan ram pawn hmun hrang hrang atangin Mizoram-ah kan unaute an lo haw khawm a, Sawrkarin kawng hrang hrangin a tanpui a, mipui leh pawl hrang hrangin sum leh pai, tha leh zung sengin tan a la bawk a ni, tiin a sawi a. Hripui kai thahnem tak tihdam tawh niin, mi eng emaw zat enkawl mek an ni a, tuna enkawl mekte pawhin beidawng leh chi-ai mai lova tawngtaina nen mi thiam enkawltute thu zawmin, dam taka hospital chhuahsan theuh turin duhsakna a hlan a ni.

Khuallian Pu Robert Romawia Royte chuan Thenzawl Sub-Division chhungah hian thil la thleng ngailo ‘Go To The People – Mipui hnenah kal rawh’ tih chu Mipuite rawngbawlna pawimawh tak pakhat a ni, a ti a. Mipui hnenah kal rawh tih hian a tum ber chu Thenzawl Sub Division huam chhunga mipuiten Office va dawr loa anmahni ban phaka Office va chhawp hnaih a ni a, Sawrkar scheme hrang hrangte anmahni bula va sawi fiaha, an hamthatna dawn theihte hrilhhriat a tum a ni, tiin a sawi a. He initiative hi February ni 25, 2020 khan Neihloh khuaah hman a ni a, Tribal Certificate, Residential Certificate, Income Certificate te pekchhuah an ni a, Aadhaar enrollment leh free medical Check up neih bawk a ni, tiin a sawi. COVID-19 vanga buaina hrang hrang thlen chhung hian, SDO (C) Office, Police, Medical Team, Task Force te tangrual chuan theihtawp an chhuah a; SDO (C) Office hian Disaster, Election leh Sanitation chungchanga hna awm a kalpui mek bawk a, faina kawngah te nasa taka hma lain Community Toilets 7 leh Individual Household Latrines 302 sak a ni tawh a, Awareness leh Training Program tam tak neih bawk a ni, a ti a. AH&Vety Department hnuaiah AH&Vety Farm hi North East India-a ranchaw chinna hmunpui ber a ni. Ran chaw ching duh tan a chi (Seed) leh a tiak (Root Stump) eng emaw zat Mizoram hmun hrang hrangah hralh chhuah a ni bawk a, Kel lian vulhna – Goat Breeding Farm pawh ni 11.4.2019-ah bultan ni tawhin tunah hian kel lian chi leh tha chi Sirohi leh Beetal vulh mek a ni a. Sial Farm – Mithun Production leh Development project bul tan mek a ni bawk a. Irrigation lamah hmasawn nan Farm complex hmun hnihah tuikhuah a ni a, NEC Farm lamah hectares 5 chawm thei sprinkles dah a ni. Ran chaw supplement atana tha tak Azolla cultivation pawh NEC Farm Complex-ah demonstration tan a ni. Duck & Poultry Farm Thenzawl-ah Ar vulh a ni a, mipui/Farmer/ran vulhtute tan a tul anga training pek thin a ni a, Ar tha chi (rainbow rooster)-a bul tan a ni, tiin a sawi.

Minister Pu Robert Romawia Royte chuan Divisional Forest Office, Thenzawl Forest Division hnuaiah Deer Park awmin, Sazuk nu 7 leh a pa 2 a awm mek tih sawiin, Green Mizoram Day-ah thing tiak 30 phun a ni a, Thing tiak tam tak thawnchhuah bakah Thenzawl Division huamchhungah Fire line 9, 10 km siam a ni a; DFO hovin Fire Awareness Campaign vawi 2 neih tawh niin, banner leh poster tar vek a ni a, International Day for Biological Diversity pualin Banner tar a ni bawk a ni tiin a sawi. PWD, Thenzawl Sub-Division hnuaiah ni 5 June 2017 atanga tan tawh Zote South to Chhipphir Road chu zawh fel a ni a; PMGSY hnuaiah S.Khawlek to Dengsur road chu cheng nuai 640.66-in 60% zawh fel tawh a ni. Kanghmun South to Neihloh Road hi Nuai 1610.25 a siam a ni a, tunah 50% zawh fel a ni, a ti bawk a ni. P&E Department, Thenzawl chuan Chalkhan-a Zozo Filling Station-ah Transformer 25 KVA a dah a, Saubhagya Scheme hnuaiah Electric Connection la theilote– Thenzawl, Buangpui leh Neihloh khuaahte Connection a pe a, Reliance Jio 0.2 Km, KV Line, 25 KVA Transformer Chalkhan-ah dah tura hmalak mek a ni a ti bawk a ni.

Pu Robert Romawia Royte chuan PHE Department, Thenzawl Section hnuaiah Tui Connection chhungkaw 801 hnenah pek chhuak a ni a; Buangpui khua chhungkaw tin hnenah tui connection pek a ni bawk a, Neihloh khuaah Vantlang zun in siam zawh tawh a ni bawk a ni, a ti a. Police Training School-ah kum 2019-2020 inkarah hengte hi kalpui a ni: Training of Trainer Course (TOT) staff mi 70 tan neih te, Basic Training Course te, 20th Batch Senior under Officer (SUO) Cadre Course mi 95 ten a zo a, Mizoram Police Unit hrang hranga mi 212 ten “Riot Control & Handling of Tear Gas” (theory and Practical) training te, District hrang hranga Mizoram Police ten Special Course cum Rehabilitation programme an hmang a, hnuchhui leh dan lova ruihhlo tawlh ruk do letna kawnga hman tangkai tur Mizoram Police Canine Squad (Uifing & a enkawltu mi 8) te chu National Training Centre for dogs, BSF Academy-ah ni 7.8.2020 ah khan an zo bawk a, hengte bakah hian Digital Class Room, Multipurpose Hall (mi 100 leng), Trainees barrack pahnih, Outdoor Firing Range, Aquatic Training-na tur leh Obstacle Course siamna tur te siamin kalpui mek a ni bawk, tiin a sawi. SAI Hockey Training Centre, Thenzawl-ah hian Naupang 40 an awm tlangpui a. International India tana khel mek Players 3 an awm a, Lalrindiki & Marina Lalramnghaki hi Junior level-ah an khel a, Lalremsiami (Kolasib) hi Senior Level-ah a khel bawk. Lalremsiami hian Rising Star Award dawngin tunah hian Olympic lo awm tura khel mai thei tura rinkai ber a ni, a ti a. Police Station te pawh Sunday tlai leh ni pawimawh deuhah te mobile traffic duty-in, Ruihhlo dona kawngah NGO nena tangrualin hmalak thin a ni a. Serchhip District- ah hian a hmasa ber atan CCTV fit a ni a. Naupang pawikhawihtu emaw, pawikhawih na tuartute emaw chawlh hahdamna atan Child Friendly Corner Thenzawl Police Station-ah dah a ni. 15th August 2019 to 15th August 2020 chhungin misual chhuichhuah chungchangah Unknown detection 6 lai chhuichhuah a ni, a ti a. College of Horticulture hi Central Agriculture University- Imphal hnuaia college 13 zinga pakhat a ni a. Zirlaite hnena Horticulture subject bika thiamna pek hi he college din chhan ber a ni a, hemi bakah hian kuthnathawktute hnena training pek leh hamthatna turin a tanpui thin a. He college-a zirlai first batch te hian an degree hmuhna tura thil tul zawng zawngte tha taka an hlen tawh avangin tun thla chhungin degree award pek chhuah theih beisei a; zirlaite tan training leh workshop vawi 3 huaihawt tawh niin, kut hnathawktu mi 20-30 velin chhimin thlai chi pawh sem chhuah thin a ni, a ti a. Central Agricultural University, Imphal bultumin ni 22-24 July 2020 khan Model Vegetable and Fruit Villages Programme hman a ni a, Thenzawl VC area pathum (3) thei leh thlai chingtute mi 137 thlanchhuah an ni, a ti a. Integrated Ayush Hospital-ah hian Panchakarma therapy ni 14.10.2019 atangin kalpui a ni a, tui thianghlima intodelh nan rain water harvesting kalpui mek a ni bawk. Covid Care Centre-ah hman a ni a, mi 33 lai quarantine tawh an ni. Ni 21.7.2020 atanga ni 31.7.2020 thlengin Covid-19 positive 13 enkawl a ni tawh a, 2 chu dama chhuah an ni bawk a ni. Community Health Centre hnuaiah JSSK ( Janani Shishu Suraksha Karyakam) hmangin damdawiina nau nei mi 46 leh naute kum 1 hnuai lam damdawiina enkawl ngai mi 10 hnenah an damdawiin awm man tumsak an ni. Kumin January atangin PMJAY Golden Card nei mi 36 te damdawiin awm man a thlawnin tumsak an ni. Integrated Counselling leh Testing Centre (ICTC)-ah HIV test leh Counselling tih reng a ni. Hospital-in Poor Fund an dawn atangin damlo mi 9 hnenah Rs. 16,952/- pekchhuah an ni, tiin a sawi.

Minister chuan Sericulture department hnuaiah Govt. Mulberry Seed Farm Thenzawl- ah Pangngang chi chhuah tur vulhna hmunpui neih a ni a, kumin chhungin Seed Cocoon 29,582 lai tharchhuah a ni, a ti a. Thenzawl Circle Horticulture hnuaiah Tomato Quintal 7 chuang leh Dragon fruit Quintal 5 chuang tharchhuah a ni. Covid 19 hrileng avanga Mizo mipuite kan intodelh theihna turin Hybrid leh Local thlai chi semin, Vegetable Supply Chain hi Horticulture Department-in a kengkawh bawk a ni. Fisheries department-in kumin chhungin Blue Revolution Scheme hnuaiah Fish Farmer 10 hnenah tanpuina cheng Nuai ruk Singthum a pe a. Food, Civil Supplies & Consumer Affairs Department hnuaiah Thenzawl hi Sub-distributing Centre a nih angin supply centre pali - Buarpui, Thenhlum, Bunghmun leh Chhipphir te a enkawl a, heng supply centre-ahte hian kumin chhung ei tur buhfai chhek khawl a ni. Mizoram sawrkar hmalakna avangin chini, AAY chhungkuate hnenah thla tin 1kg Rs. 24-in sem a ni a, Sawrkar ruahmanna PMGKAY kaltlangin AAY leh PHH te tan Buhfai a thlawna sem a ni, tiin a sawi. Thenzawl Sub-Circle, Agriculture Department chuan Lo neitu chhungkua 287 te hnenah Bekang chi 165 kg leh Vaimim chi (Hybrid) 280 kg a sem chhuak a. WRC Farmers chhungkaw hnihte hnenah Subsidy-in Power Tiller pakhat ve ve pek an ni. Chhungkaw 67 te hnenah subsidy-in hlo kahna bur (Sprayer ) pek a ni bawk a ni, tiin a sawi. Kum 2019-2020 academic session-ah result tha neiin Class X, XII (Sc.) leh XII (Humanity)-ah 100%-in an pass; Zirlai 2-in Petroleum Conservation Research Association (PCRA) Quiz Competition, Kolkata-a neihah an tel ve. NCC unit chu NCC Directorate Aizawl hnuaiah kalpui mek a ni. SBI Branch Manager-in JNV-ah hian Career Counselling/Guidance neih a ni a, Anti Tobacco Board-in Health Awareness Campaign an nei. SDO (C) leh Doctor rualin General Awareness on Gender Sensitization, Novel Coronavirus chungchangah hun an hmang bawk a ni, a ti a. Khuallian Pu Robert Romawia Royte chuan Thenzawl Tourist Lodge-ah hian staff 7 awm mekin, mikhual zin veivak dawngsawngtu ber an ni, a ti a. August 2019 atanga April 2020 chhungin Revenue Rs. 13,86,500/- lai Mizoram sawrkarah a chhunglut tawh a ni, a ti bawk a ni. SDEO, Thenzawl hi ni 15.10.2008-ah din niin, khaw paruk – Thenzawl, Buangpui, Neihloh, Kanghmun South, Zote South leh Chhipphirte a huam a. School naupang – 2412 leh Staff – 67 an awm mek a. Sawrkar hmalakna angin M/S leh P/S naupangte Mid Day Meal pek vek an ni, tiin a sawi a ni.

Khuallian chuan vanduaithlak takin khawvel huapin hripuiin min tibuai a, Mizoram leh India ram pawhin kan hmachhawn ve mek a. Chumai bakah lirnghingin mipui min tibuai bawk a, heng zawng zawngah hian Mizoram mipuite’n kan thiamna leh finna, tha leh zung leh tawngtaina nen kan ram himna leh hmasawnna tura kan tanho a ngai takzet a. Chuvangin, Mizoram NGO, kohhran leh mipuite chungah kan sawrkar-a rinna in nghah tlat avang leh min thawhpuina avangin lawmthu a sawi a. Vawiin hian, zalenna sualtu mi huaisen leh kan ram siamtute hmathlir chawinung a, vawnghim a, tipuitling zel turin inhlan thar leh ila, an thisen leh thlantui a thlawnin i luanraltir lo ang u. Khawvel pum thlirin, inrikrapna leh indo thuthang te, ralmuan lohna chi hrang hrang kan hria a, Mizoram hmasawnna bakah, remna leh muanna vawngnung zel turin rim tak leh huaisen takin i thawk zel ang u tiin a sawi a ni.

Minister Pu Robert Romawia Royte hian Thenzawl Sub-Division huam chhunga zirlai ti tha te- Vanlalmuanpuia, C.Lalrinsanga, C.Lalhruaizeli leh V.Lalthazuali te lawmpuina leh pawisa a hlan a. Independence Day Essay Writing Competition a pakhatna leh pahnihna- Gravy Lalnunpuii leh Malsawmdawngzela te hnenah lawmpuina leh pawisa a hlan bawk a. COVID-19 hripui dona kawnga medical team- Dr. Ramlalnghaki, Dr. Benjamin Malsawmtluanga, Dr. Betsy Lalhlunmawii, Dr. Rachael Laldinkimi, Darnunchama, Ricky V.L Sangzuala, V. Lalhruaitluangi, Lalthlamuana, V.Vanlalhruaia, John Malsawmtluanga, Vanlalfinga, R.Lalramnghaka te hnenah chawimawina a hlan a. Police medal for meritorious services, 2020 dawngtu Pu Lalthakima, Chief Drill Inspector hnenah pawh chawimawina a hlan a.

Khuallian Pu Robert Romawia Royte hian SDO (C) Office Compound-ah Independence Day, 2020 hriatreng nan thing a phun zawhah national anthem play in he hun hi khar a ni.