No.4114/2020-2021

Aizawl, the 15th August 2020 : Ram pum leh Mizoram chhunga hmun hrang hrang rualin vawiin khan Hnahthial District ah pawh Independence Day lawmna neih a ni a. Independence Day lawmna HBSC Ground No I a neihah Minister Pu T J Lalnuntluanga, Environment, Forest & Climate Change, Transport leh Law & Judicial and Parliamentary Affairs enkawltu chuan Hnam Puanzar pawt pharhin, Independence Day vawi 74-na thuchah a sawi a ni.

Pu TJ Lalnuntluanga chuan India Independence Day duhsakna leh chibai he huna kalkhawmte leh District mipuite bukin Ram dang awpbehna atanga chhuahna Ni Ropui tak champha hmanna, District anga tum hnih lai Hnahthial a hman a ni ta chu a ropui a tih thu a sawi a. India ramin zalenna a neih theihna atana Ram hruaitu hmasa ten an nunna hlu tak leh hun an lo hlan tawh tiin India zalenna atana India Hnam Pa Mahatma Gandhi te, Jawaharlal Nehru te, Dr. Rajendra Prasad leh hruaitu dang tam takte inpekna leh inhlanna chu ropui a tih thu a sawi.

Minister chuan Hnahthial mipuiin hun rei tak chhung an lo nghahhleh em em mai leh an lo thlirlawk thin District an ni chu ropui leh lawmawm a tih thu sawiin District thar hmasawnna turin mamawh tam tak a la nei a, hetih rual hian America ram hruaitu ropui John F. Kennedya thusawi ropui tak kha kan rilruah hre reng ila ka duh a, John F. Kennedya chuan“I ramin i tan engnge a tih theih ngaihtuah lovin, i ram tan engnge i tih theih ngaihtuah zawk rawh” tiin a lo sawi a. Kan ram hmasawnna tur hian, kan zavaiin tih theih kan nei theuh a ni tih i hre thar ang u. Kan ram a bikin kan district tharin hma a sawn theihna tura kan tih theih theuh ti turin puanven i sawi chhing ang u, a ti.

Hnahthial Damdawi In chu Health Minister leh bialtu MLA ni bawk Dr.R.Lalthangliana hmalakna nasa tak avangin District Hospital-ah puan a ni tawh tiin CMO leh Medical Superintendent te pawh dah thuai tura hmalak mek niin tunhnai khan Naupang Specialist (paediatrician) pawh rawn dah a ni tih a sawi a. Hnahthial khawpui chhung tih changtlunna atan UD&PA hnuaiah Rs.Nuai 200 ruahman anih thu te, Independence day hmanna pavillion pawh Rs.Nuai 80 senga sak that a nih tur thu te, khawpui chhung hmun hrang hrangah inkalpawhna leh Side drain te, Retaining wall te siam a nih theih nan ruahmanna siam mek a nih thu te leh Rallang tlangah DC Staff thenkhatte Office tur leh Quarters tur pawh chak takin sak mek a nih thu te Minister chuan a tarlang a. Sports Minister hmalakna chak tak avanga NEC sum a Hnahthial a phullem phahna tur chu District thar infiammite tan malsawmna ala nih ngei a beisei thu a sawi bawk.

Hnahthial District chhunga Thalaite leh Kut hnathawktu ten eizawnna ngelnghet leh hlawk zawk an neih theih nan bialtu MLA Dr.R.Lalthangliana ruahmanna hnuaiah District Bawrhsap kaihhruaiin member 9 awmna 'Core Committee on Skill Development Framework' din a nih tawh thu tarlangin hetianga mumal taka Skill Development kalpui hi Mizoramah a hmasaber inni tiin Hnahthial thalai ten an la chhawr tangkai hle dawn a ni a ti bawk.

Mizoram hmasawnna turin Socio-Economic Development Policy (SEDP) hmangin sawrkar-in hlawhtling taka kalpui a tum a. Hei hian hmasawnna lian tak peng pawimawh tak tak a hawlkim a, Mizoram chu state intodelh, khawtlang nun nuam, mipui thlamuanna leh zalenna, zoramthar a siam dawn a ni. SEDP kalpuina turin kum 2019-2020 sawrkar kum chhung khan budget pumpui cheng vaibelchhe 759 atangin cheng vaibelchhe 561.62 chu Department hrang hrangah sem a ni a. Hripui lengin harsatna namenlo a siamsak chung pawhin he policy hlawhtlinna tur hian SEDP Board ten chawl lovin hna an thawk a, Department hrang hrang kaltlangin tunah hian hma chak taka lak chhunzawm zel a ni, a ti.

Pu TJ Lalnuntluanga chuan Khawvel pum huap a hri leng Covid-19 Pandemic in kan ram pawh min tuam avangin eizawnna leh kan nunphung kawng hrang hrangin a buai nasa hle mai a. Kan ramah pawh mi tam tak nun a tibuai hle a ni. Hetih lai hian Sawrkar chuan he hripui laka kan him theih nan rang takin hma a la nghal a, State Level Task Force din nghalin District Level Task Force leh Village/Local Level Task Force on COVID-19 pawh ram pumah din zui nghal a ni. He hripui kaihhnawiha kawng hranga hranga hna thawk tur Task Group engemawzat Sawrkar chuan a din bawk a ni. He hripui dona-ah hian Mizoram sawrkar chu Pathian zarah tih tur tul ti a hma la hmasa pawl a ni zel a, tunah hian India ramah pawh a control tha ber pawl state kan ni, a ti.

He hripui leng karah pawh sawrkar hi mipuite mamawh phuhruk turin a hmanhlel hle mai a, mipui kan tam lohna turin vawiin thleng hian sawrkarin a tih tur a ti char char reng a. Development lamah pawh department hrang hrangin hun khirhkhan tak hnuaiah hna taima takin an thawk zel a, tunah hian he hripui leng karah hian hmasawnna hrang hrang thawh mek zel a ni, a ti bawk.

Minister chuan Hri leng karah hian damna leh hriselna tha nei theuh turin duhsakna ka hlan che u a. He hri dona atana kan tih theih theuh te ti chhunzawm zel ila, Sorkar ruahmanna awihin, mithiamte thusawi zawm tlang zel ang u. Mitin in kan tih theih 3 te han tarlang nawn leh ila – Social Distancing (mi dangte nena inhlata awm), Kut Silfai that, leh Face Mask vuah te hi thil harsa lo tak, kan zavaia kan zawm theih theuh a ni. Hnahthial District ah Covid-19 Free District hun rei tak in ni kha a lawmawm hle a, in tanrualna a fakawm tak meuh a ni. Tunah Active case 1 Hnahthial District ah in lo nei ve ta mek a, ani pawh dam tha thuai turin duhsakna ka hlan a. Covid-19 dona kawnga hma la chhunzawm zel turin ka ngen a che u, a ti.

Environment, Forest and Climate Change Minister a nihna angin Pu TJ Lalnuntluanga chuan sik leh sa inthlak danglam nasa siamtha turin thing leh mau mamawh chin bak chu humhalha, phunbelh zel tura mipuite chahin ramngaw tichereutu chu hnam hmelma an nih thu a sawi a ni.

Independence Day lawmnaah hian Hnahthial DC Pu Vanlalmawia, SP Pu Labiakkila leh District a Head of Office-te an tel a. Thu a sawi zawh hnuin Minister hian Hnahthial Officers Club-ina kawng hrang hranga Hnahthial District chawimawitu leh District a mi hlawhtling mi 5 an thlanchhuah te hnenah citation HOC in an siam a hlan a. Independence Day Ceremonial Guard of Honour chu 2nd Battalion MAP in an pe a. Ground programme zawh hian DC Bangla ah thingpui ruai Minister puala siam chu Minister leh sawm bik mi tlem te ten an kilho a ni.