No.4113/2020-2021

Vawiin chawhma dar 10 khan Zuchhip field, Khawzawlah Khawzawl district din a nih hnua a vawihnih nan India Independence Day vawi 74-na ropui taka lawm a ni a, Deputy Chief Minister Pu Tawnluia'n khuallian niin a hmanpui a. Health & Family Welfare Board Vice-Chairman Dr. Z.R.Thiamsanga, MLA leh Veterinary, Fisheries & Sericulture Development Board Vice-Chairman Pu C. Lalmuanpuia, MLA ten an hmanpui bawk a ni.

Khuallian Deputy Chief Minister hian Independence Day lawmna hmun a thlen veleh hian India hnam puanzar pawt pharhin sipaiten zahna chibai an hlan a chhanglet a, Independence Day thuchah a sawi chhunzawm a ni.

He ni lawmnaah hian khuallian chuan Khawzawl district mipuite chu Zalenna chibai a buk a, India mi zawng zawng te tan chuan "Hlawhtlinna Ni" a ni tih sawiin India ram Independence suala nunna hlantu te leh hruaitute zahna chibai buk turin mipuite a sawm a, India ram a lo ralmuan nan leh hmasawn zel theih nan leh inpumkhatna atana thawhpuiah Khawzawl district mipuite a sawm a ni.

Khawvel pumpuia Covid-19 hripui lengin Mizoram pawh a rawn tuam ve tak avanga Independence Day kan lawm dan tihdanglam a tul tih sawiin mipuite himna ngaihpawimawh avangin, Independence Day lawmna hmuna mipuite kal lova, TV kaltlanga lo thlir turin ruahmanna siam a ni a ti a. Sawrkar hnathawkte, khawtlang hruaitute, tlawmngai pawlte, hripui dona kawnga theihtawp chhuahtute, vanduai thlak taka hri kai ve mahse dam chhuak tawh te, mi sawm bik te nen chauh Independence Day lawmna hmunah kalkhawm a ni ta tih a sawi.

Khuallian chuan kumin March thla tawp lam atangin Covid-19 hripui laka in venna atan Inkharkhip (Lockdown) a nih avangin Sawrkar hna leh hmasawnna hnathawh a kal chhunzawm hleitheilo tih sawiin, Mizoram Sawrkar chuan he hripui lak atang hian dam khawchhuak phawt ila, tichuan ram hmasawnna hna chu kan la thawk dawn a nia, tiin Covid-19 dona atan hian thapui a thawh a. He hripui donaah hian ram mipuite kan tang rualin tha kan thawh theuh a. Sawrkar hmalakna leh ruahmanna tawiawmin Kohhran te, YMA leh Tlawmngai pawl hrang hrang ten hma an la a, hei hi a ropui tak zet a ni, a ti a. Sawrkar-in theihtawp a chhuah a, Covid-19 dona kawngah a hmatawnga thawktu "Frontliners" zawng zawngte inpeknaah lawmthu sawiin Health workers – Doctor te, Nurse te, Technician leh Medical staff hrang hrang te inpekna a fak a, Task Force hrang hrang tlawmngaihna leh inpeknate, Mizoram Police thawhrimnate fakin, pawl hrang hrang leh mimal te, sawrkar hnathawk leh Kohhran leh YMA ten sum leh pai tam tak an thawh te chu ropui a tih thu sawiin, dan leh thupek kengkawhtu department te, ei leh bar ngaihtuah tu department te, mipui hriattur thu pawimawh puang thintu te fakin, hetianga thawhhona tha hian thawhchhuah (Result) tha tak a siam a. Vawiinah hian Mizoram chhungah he hripui avanga nunna chan kan la neilo te hi a lawmawm tak zet a ni a ti a. Kan tawngtaina chhangin Pathianin min venghim zel a ni tih hre reng tura mipuite chu chahin, Covid-19 laka invennaah hian mahni theuh kan pawimawh tih hre chunga Sawrkar hmalakna tha taka tawiawm zel turin mipuite a sawm a ni.

COVID-19 dona kawnga Khawzawl District hmalakna fakin Bawrhsap kaihhruaina hnuaia Superintendent of Police, Commandant 2nd IR, District chhunga sawrkar pisa hrang hrang hotute leh Sawrkar hnathawkte, NGO hrang hrang YMA, MHIP, MUP, Kohhranho,Task Force te thawhhona tha chu ropui a tih thu a sawi a. Rim taka thawktu Health Department-a Doctor leh Nurse te a bik taka lawmthu hrilhin, sawrkar leh mipuite tanrualna avangin harsatna lian tak awm lovin vawiin kan thleng thei hi a lawmawm takzet tih a sawi.

India ram ke chheh rualin Mizoram pawh kawng hrang hrangah hmalam panin a kal zel tih sawiin khuallian chuan hmasawnna tam tak kan neih zingah Nikum August ni 12, 2019 khan Khawzawl District thar pawh awmlo ata a lo piang ta a. Hun rei tak chhung Khawzawl District beisei taka kan lo thlir thin Mizoram sawrkarin a tak taka a rawn thlen ta hi a lawmawm bakah, hlawhtlinna ropui tak a ni, a ti a. Khawzawl District rual a piang Saitual leh Hnahthial te a lawmpui thu sawiin, Khawzawl District alo pian theihna tura Jail tangte, tha leh zung, ngaihtuahna leh sum leh pai sengsotu zawng zawng te zahna chibai bukin, he hlawhtlinna hi kan zavaia hlawhtlinna a ni a, District tharin hlawkna a ken tur apiang chu kan zavai atan a ni zel dawn a ni, a ti a. Khawzawl District kum khat a nihna chibai bukin Khawzawl district chu tangruala tuaihnum zel turin mipuite a chah a ni.

Mizoram Sawrkarin District tharte tichangtlung turin theihtawpin hma a la mek tih sawiin, Khawzawl ah pawh DC Office leh S.P Office ten changtlung takin hna an thawk mek tawh a. DUDO Office pawh November ni 5, 2019 khan hawn a ni a, District Sub-Hospital pawh February Ni 14, 2020 khan District Hospital-ah hlankai a ni bawk tih sawiin, Khawzawl District Agriculture Office hawn a nih tawh thu a sawi a, Treasury Office leh Revenue Office te pawh hawn leh mai theih tura buatsaih mek a nih thu a sawi bawk.

Faina lamah Khawzawl District chu hmahruaitu a nih thu sawiin, kum 2019 a Mizoram pum huap khawpui fai inelna (Mizoram Cleanliness Competition ) ah Biate chu dinhmun sang ber (1st Rank) ah dingin khawpui fai ber lawmman a dawng leh a. Khawzawl pawhin Category II ah lawmman 7-na a dawng a, Tualte khua pawh kum 2019 a Khawzawl District khaw fai ber lawmman pek a nih thu a sawi a ni.

Khuallian chuan Khawzawl District chhunga BPL awm miah lohna khaw 5 (panga) Pamchung, Rabung, Tlangmawi, Chawngtlai leh Riangtlei te hnenah Participatory Community Development Project for BPL Free Villages hnuaiah Rs. 40,00,000.00 (Cheng Nuaih Sawmli) theuh pek tur an nih thu sawiin, Deputy Commissioner’s Office kaltlangin Rs. 16,00,000.00 (cheng nuaih sawmparuk) theuh 1st installment ah pek a ni tawh a, hnathawh chhunzawm zel a ni, a ti.

Mizoram Sawkarin Flagship Programme "Socio Economic Development Programme (SEDP)" hmanga ei leh bar, sum leh paia keimahni thawhchhuah ngeia Intodelh hi kan thupui ber a ni tih sawiin khuallian chuan Covid-19 hrileng avangin duh angin hna thawh theih rih loh mahse, Pathian zarah hripui lak atang hian kan dam khaw chhuak anga theihpatawp chhuahin kan hnam humhim tur leh kan intodelhna tur hian Sawrkarin ruahmanna siamin a thawk zel dawn a ni, a ti a Hemi tihlawhtling tur hian ram mipuite tawiawmna a ngen a ni.

Khuallian hian Independence Day zingkarah District Hospital, Khawzawl tlawhin Independence Day pual tanpuina (charity) a hlan a, Hospital-a thawkte leh damlote Independence Day cake a hlan bawk a ni.

Zuchhip Field a Independence Day lawmnaah hian Khawzawl district ti hmingthatu Khawzawl Police Station leh Miss Mizoram 2020 Zirsangpuii te chawimawina hun hman a ni a. chawimawina thuziak leh tangkafai Rs. 5000/- hlan an ni. Khawzawl Police Station hi kum 2019-a Mizoram puma Police Station thaberah thlan a ni.

Zuchhip Field-a Independence Day lawmna hun hman a nih hnu hian sawmbikte pualin Electric Veng YMA Hall-a DC's at Home neih a ni.