No.4112/2020-2021

Saitual, the 15th August 2020: Vawiin chawhma dar 10:00 khan India leh Mizoram state hmun dangte ang bawkin Saitual, District Headquarter, Saitual District-ah pawh Independence Day lawmna inkhawm neih a ni a. Saitual College kawta Independence Day lawmna hunah hian khuallian Pu K.Lalrinliana, Minister of State, FCS&CA,etc., chuan India Hnam Puanzar pawtpharhin 2nd IR parade contingent leh Home Guards Band Party ten Hnam Puanzar zahna chibai an buk chu a chhang let a. Indepedendence Day 2020 puala thuchah a sawi chhunzawm nghal a ni.

Saituala Independence Day 2020 lawmna inkhawmah hian khuallian Pu K.Lalrinliana chuan ram tana zalenna suala nun hlantute, an vanglai hun zawng zawng lung inah leh harsatna kara hmang ralte chibai a buk a, he zalenna vawn him nan leh ram-in hma a sawn nan mi tam tak tha thawh chhunzawmtute chibai a buk bawk a ni.

Corona Virus hrileng-in kan nun phung leh eizawnna tam tak a tibuai tih a sawi a. He buaina karah erawh mipui ten harsatna an tawh loh nan sawrkarin theihtawp a chhuah tih a sawi a. Kohhran leh tlawmngai pawl ten sawrkar an thlawp tlat avangin kan dinhmun a ziaawm phah a ni a ti. Khuallian chuan ama enkawl department a hmalakna langsar zual te a sawi chhunzawm a. "Inkharkhip ngai khawpa kan awmlai pawhin mipui-in ei leh bar harsatna kan tawh loh nan State sawrkar leh Central sawrkar hmalaknain Ration buhfai, Dal leh Chana eng emaw chen a thlawnin sem a ni a, LPG gas-te pawh chhungkaw harsa zualten a thlawna an lak theih nan IOCL kaltlanga ruahman niin, pek chhuah a ni", a ti.

Supply Minister chuan Covid-19 hrilengin Mizoram a tlakbuak laia Mizoram khawchhak lam tuipuiral khuate lirnghingin a sawi reng chu pawi a tih thu leh a tawrhpui thu a sawi a. Mahse hei hian ei leh bara kan intodelh tulna rilru mipuiah a tuh nasa a ni a ti a. He phurna hi SEDP hnuaia Board hrang hrang kaltlangin hlawknaah chantir tum a ni a ti. SEDP hnuaiah pilot project atan AH&Vety department-ah beneficiary 1020 thlan chhuah tawh an ni a,Vawkpui vulh mi 20 leh vawk vulh mi 200 te hnenah Cheng Nuai thum (3) theuh pek an ni dawn tih a sawi a. Broiler chhungkaw 400, Rainbow Rooster chhungkaw 400 te hnenah pek chhuah tur ruahhman fel tawhin chhungkaw khatah Cheng 1,50,000 pek phawt an ni dawn a ti a. Sericulture department hnuaiah beneficiary 500 te hnenah kumin hian Pangang khawi tanpuina atan Cheng 1,40,896 theuh pek phawt tura ruahman a ni tih a sawi bawk a. SEDP hnuaiah tho hian Special Eradication of Illiteracy Project kalpui niin kum 2021 India chhiarpuiah ziak leh chhiar thiam tamna ber State nih tumin district zawng zawng beihpui thlak mek a ni a ti.

Kum 2019-2020 budget-ah cheng Vaibelchhe 561.62 chu department hrang hrangah SEDP atan dah a ni tih a sawi a. Horticulture hnuaiah Lengpui leh Hmunpui khuaahte Model Bamboo plantation siam niin, mau tiak 79,000 phun tawh a ni, Dragon fruit chin nan, a bultan nan chhungkaw 95 hnenah cheng Rs.30,000/- theuh a pek chhuah phawt a ni a, an tihthat dan a zirin cheng 1,20,000/- thlenga pek tura ruahman a ni bawk dawn a ni a ti. Fisheries department hnuaiah chakai (Aikam leh Aifiar) farm pilot project kalpui mek niin, sangha dil neitute hnenah major Carps Nuai 48 leh Common Carp Nuai 50.12 lai 50% subsidized a pek chhuah tawh niin sangha chaw pawh Quintal 6265 nos lai 50% subsidized a lei turin sangha khawitute tan lei tura ruahhman a ni, sangha tuina len 500 Nos,vsangha inthlahpunna len 800 nos leh a note khawina len 240 nos te chu 50% subsidized a pek chhuah a ni a ti.

Supply Minister chuan SEDP bakah hian Fisheries Department chuan RKVY leh Blue revolution kaltlangin sangha note thanlenna tuikhuah siam nan mi 150 hnenah (30Ha) tanpuina ape chhuak tawha, sangha khawi mite an sangha dil khuahna hmuna an In tur sak tanpuina mi 80 pek anni tawh bawk tih a sawi a. Central sawrkar scheme thar Pradhan Mantri Matsy Sampada Yojana (PMMSY) hnuaiah State in sangha khawia kan hmalakna tur ruahman chu Central-ah thlen a ni tawh, kumin Financial year a hmang hman tura ruahman a ni a ti.

Saitual bial bika hmalakna sawiin Minister chuan, "Tun COVID vanga inkharkhipah, kan thenawm state atangin sangha chi leitur avang em em a, duhkhawp lei tur hmuh zawh a ni lo a, sangha khawitu ten an thar tlem a hlauhawm hle a, hemi hre reng hian Fisheries department chuan kan sangha no tih keuhna hmun 7 a bun tawhte chu tuai thar turin hma a la tan a, heng zing a hmun 5 Lunglei,Lengpui,Kolasib leh Saitual district chhungah Tamdil leh ZR fish farm, Kaihzawl zau, Keifang-ah te tih keu tan a ni tawh a ni. Heng bakah hian Saitual District leh hmundangah Fish feed Mill plant din ni tawhin, Saitual a mi hi a khawl khawihnawn ngai leh tul dangte buaipuia,peih fel hnuah Fish Farmers Association, Saitual-te enkawl chhunzawm turin ruahman tum a ni" a ti. Saitual District-a Fisheries Department in ben belna turin KVI hmun bula mimal ram chu Saitual VC ten Department-te an kawhhmuh tawh tih a sawi a.,District office din nan hmalak zel a nih thu sawiin hengte bakah hian MGNREGS hmangin sangha dil 126 lai chu Saitual District-ah laih tawh a ni bawk a ni a ti.

AAY chhungkaw tinah Chini Ration sem tan leh a ni a, tun inkharkhipah Central sawrkar leh State sawrkar hmalaknain PMGKAY buhfai a thlawnin NFSA (AAY & PHH) beneficiary-te hnenah mi pakhatah Kg 5 zel sem niin, hei hi April, May leh June sem tawh a ni a, a dang a thlawn bawkin thla 5 sem leh tur niin August-December-ah sem a ni ang a ti a. State sawrkar-in NFSA(AAY leh PHH) leh card var APL rethei zualte Village/Local Level Task Force-in an thlan ten inkharkhip tan tirh April thlain Ration buhfai normal quata a thlawnin a sem bakah, inkharkhip chhunzawm zelah harsatna zual phuhru turin APL-card varte tan June thlaah mipakhat tan 5 Kgs zelin ration tihbelh a ni bawk a. Heng bakah hian central leh state sawrkar hmalaknain Atma Nirbhar Bharat(ANB) hnuaiah NFSA (AAY & PHH) ten Dal thla 3 (April-June) tan a thlawnin chhungkaw 1 ah kg 1 zela sem a ni tawh bawk. Atma Nirbhar Bharat (ANB) hnuaiah tho hian NFSA ten chana a thlawnin sem mek a ni bawk, hei hi chhungkaw khatah 1 kg niin, thla 3 chhung (July-September) sem a ni ang a ti.

Saitual District leh District thar dangte-a DCSO office hawnna tur proposal siam ni tawhin hotute lamah thlen a ni tawh tih a sawi a. Supply Department a enkawl hnuin sawrkar hmalakna chaktak hnuaiah Supply Godown 10 nos sak thar ni tawhin tunah hian 21 nos dang sak tharna tur peih fel thawkhat a ni a ti. Heng zingah hian Saitual district khaw pahnih Vanbawng leh Phuaibuangte pawh an tel a ni a ti a. Saitual-a Legal Metrology ram tur pawh DC leh Joint VC phalnain Saitual-ah enfel tawh a ni tih a sawi a. Working Standard Laboratory Saitual leh Khawzawl a sakna tur cheng Nuai 50 pawh centre Sorkarin a rawn dah tawh a ni a ti.

LAD hnuaiah VC ten mahni khaw hmasawn nan an hman tur cheng Nuai 4544 (Nuai sangli zanga sawmli pali) chu Excluded Area Fund hnuaiah V/C te hnathawk turin pek an ni tawh a, peih fel a ni a, hemi atang hian Saitual district khaw hrang hrang tan cheng Nuai 212 (Nuai zahnih sawm pahnih) VC te pek an ni a ti a. Nikum Panchayati Raj Ministry a zu dawr hnuah cheng Nuai 1624 ( Nuai sangkhat zaruk sawmhnih pali) hi Excluded Area Fund atan tun hnaiah min rawn pek belh leh a ni a ti. 15th FC hnuaiah 93 Crore (Nuai Sangkua Zathum) hmuh a ni a, hemi atang hian Saitual District hman tur Cheng 567.30 ( Nuai Zanga Sawmruk Pasarih leh Singthum) ruahman a ni a ti a. District LAD Office sakna turin Chief Minister hmalaknain theihtawp chhuak mek a ni a ti.

Minister chuan ram pumin Power Supply tha leh mipui ten tui kan mamawh ang phuhruk tumin sawrkar-in hma a la mek zel a, hriselna tha kan neih theih nan pawh hmalak zel a ni a ti a.

"Vawiin hun kan hmannaah sawrkar hmalakna zawng zawng leh a hmalak tumnate a chipchiara sawina hun a awm lova. India Independent-na pawh kum 73 a lo pumhlum tawh a, Independent hi ram dang emaw hnam dang emaw awpbehna atanga kan zalenna anih rualin mahnia inrelbawl leh khawsak hrang midang leh ram danga innghat lo kan ni tih a kawk tel bawka, mahni inrelbawl leh khawsak hrang midanga inghat lo tak tak kan nih theih nana pawimawh chu Ram kan intodelhna hi a ni, hemi atan hian kan ram hmun tinah kan mamawh thar chhuah leh siam chhuah kan neih apawimawh hle a, India ram hnampa Mahatma Gandhi-te tuna kan Prime Minister leh kan Chief Minister zahawmtak te pawhin an ngaihpawimawh em em chu “Local – (Tualchhung)” thar leh siamte nasa zawka kalpuia, mahni tualchhung theuh atangin a theih ang angin intodelh kan tum a pawimawh hle a, COVID hrilenga kan buaina leh harsatna ram mipui ten kan tawh atangin a lang chiang hle a ni. Ei leh bara kan intodelh hi SEDP pawhin a tum bulpui ber a ni", a ti.

Covid-19 hrileng avangin Saituala Independence Day 2020 lawmna inkhawmah hian mipui leh official tam zawk te an tel thei lova, parade contingent march-past pawh an awm lo a, 2nd IR Bn, Khawzawl ten Hnam Puanzar Rashtriya Salute an pe a, Home Guards band party ten National Anthem an tum thung a ni.