Vawiin hi Independence Day vawi 66-na a ni a; Mizoram khawpui Aizawl-ah pawh tukin zing dar 9.00 khan A.R. Ground-ah ropui taka lawm a ni. He hunah hian Chief Minister Pu Lal Thanhawla chu khuallian a ni.

Pu Lal Thanhawla chuan, “Zalenna hnuaiah India ram Danpui chuan keini hnam hnufualte tan ruahmanna hrang min siamsak a, hengte hmang hian kan chanvo dik tak chang turin theih tawp kan chhuah zel tur a ni” a ti. Ram hruaitute leh sawrkar hnathawkte chu mipuiten fir taka kan teh thin a pawimawh thu sawiin, “Ram hruaitute leh sawrkar hnathawkte hi an dinhmun leh an khawsak dan a inmil em tih te, ram tan an thawk tak tak nge anmahni inhaivur nan an hmang tihte hi mipuiten kan teh fo tur a ni a; chutianga mawhphurhna neite chuan fir taka teh an cho tur a ni” a ti. Chief Minister chuan Mizoram hri vei thalo tak chu eirukna a nih thu sawi langin, “Corruption hian sum leh pai eirukna chauh ni lovin, dawngdahna te, thatchhiatna te, zawmthawtna te, kut tling lova sum hailuh duhna rilru te, tlemte chauh thawka tam tak seng tumna rilrute hi a huam vek a. Sawrkar hnathawkte zingah chuan corruption hi a zung kan phawi tan tawh a; a phoro chhung erawhin hun a la duh deuh ang” a ti. Pu Lal Thanhawla chuan mipuite chu kan ram hmasawnna leh dinchhuahna tura thawhpui-ah sawmin, “Kan ram chhe lai siamthat hna hi kan zavaia kovah a innghat a; he hna thawk tur hian tumah kan bang theilo a ni” a ti.

Independence Day vawi 66-na lawmnaah hian Chief Minister Pu Lal Thanhawla chuan heng a hnuaia Medal leh Award-te hi a sem a ni:

1) Huaisen Lawmman: Jeevan Raksha Padak Award chu C. Lalduhawma (L)S/o C. Lalpara, Bethlehem Vengthlang, Aizawl hnenah 2.4.2011-a Chite luikam tuikhuaha naupang tla a chhanhimna lama a nunna chan ta hnenah hlan a ni a. Sarvottam Jeevan Raksha Padak Award chu Martin Lalthamawia S/o K. Lalchhuanga, Keifang leh Lalremmawia sailo S/o Chhuanvawra Sailo, saitual, Chhim Veng te hnenah 27.11.2009 zing dar 2.45-a Silchar daia MST Bus suam tumtu misual 10 rual zet kut lawnga lo bei lettute hnenah hlan a ni bawk.

2) Governor’s Gold Medal: An hna an thawh that vangin he medal hi - Inspector B. Lalnghakliana, Anti-Corruption Branch, Aizawl leh ASI C.L.L. Muana, Khawzawl PS, Champhai District te hnenah hlan a ni.

3) State Award to Meritorious and Outstanding Tecahers chu – Pu Lalthangmawia, Principal, Mamawii HSS te; Pu Lalrinmawia Ngente, Headmaster, Govt. Middle School –I, Thingdawl te leh Pi C. Lalbiaktluangi, Headmistress, Bazar Govt. Primary School, Lunglei-te hnenah hlan a ni.

4) India President chuan Mizoram Fire & Emergency Service hnuaia thawk mek mi pahnih – Leading Firemen H. Buankhuma leh Leading Firemen Ralkapchhunga te hnenah hna an thawh that chungchuan avangin Fire Service Medal a rawn pe bawk a ni.

Vawiina A.R. Ground-a Independence Day lawman inkhawmah hian parade contingent 26 an awm a. Silai keng contingent 5 zinga lawmman dawngte chu – 1-na Ist Bn MAP, 2-na 3rd Bn. MAP leh 3-na 173 Bn CRPF te an ni a. Silai kenglo zingah 1-na Home Missions School NCC, 2-na Govt. Hrangbana College NCC, 3-na Aizawl North College NCC an ni a. School contingent zingah 1-na Tuikual South H/S, 2-na St. Paul’s HSS, 3-na Tiny Tots H/S te an ni. Parade Commander-te chu Pu Vanlalnghenga, SDPO, Sakawrdai leh Pi lalthangpuii Pulamte, SDPO, Aizawl North te an ni.

(INDEPENDENCE DAY-A CHIEF MINISTER PU LAL THANHAWLA THUSAWI PUMPUI CHU A HRANPAIN DIPR WEBSITE-A SPEECH AH DAH A NI E)