Chief Secretary Pu Vanhela Pachuau hovin vawiin tlai khan CS Conference Room ah Mizorama lung lakna Quarry him zawka enkawl dan tur a kaihhnawih department hotu ten an sawiho a. Chief Secretary Pu Vanhela chuan lung laknaa kan fimkhur tawk loh vanga mihring nunna chan an awm thin chu thil pawi tak a ni tiin him leh tha zawka Quarry kan hman thiam a tul a ni, a ti. Meeting ah hian kum 2004 atanga August 2012 thlenga Quarry hmuna leimin vanga chhiatna tum 13 a thlen tawh thu leh mi 26 laiin nunna an chan tawh thu tarlan a ni a, Meeting chuan lung lakna te chu tihtawp ngawt hleih theih a nih loh thu te sawiin tuna lung lak nana hman mekte chu a him leh him that loh uluk taka enfiah vek ni se tiin an rel a, lung lak theihna permit an neih leh neih loh te pawh enfiahin permit nei lo te chu permit dil tura hma la turin thla khat chhung hun pek ni se an ti. Chumi hnu-a permit nei lo zawng zawngte chu tihtawpsak ni se, permit pek dawn pawhin uluk lehzualin a him tawk leh tawk loh te ngun taka enfiah thin ni se tiin an rel bawk. Lung lakna enkawl dan tur changtlung zawk pawh uluk takin la duanchhuah ni se an ti a ni.

Vawiin meeting ah hian a kaihhnawih department hrang hrang hotu liante an kal kim hle a, Dr S.S.Garbyal, Principal Secretary & PCCF, Pu R.L.Rinawma, Principal Secretary, Revenue, Pu P.C.Lallawmsanga, Principal Secretary, Disaster Management & Relief, Aizawl DC Dr. Franklin Laltinkhuma bakah PWD, Geology & Mining, Revenue, Disaster Management & Relief department leh Pushpak hotu te an tel a ni.