No.3274/2021-2022

Aizawl the 3rd December, 2021 : Food, Civil Supplies & Consumer Affairs Department hnuaia din, Sub-Committee on Quality Control of Cement & iron Rod thurel bawhzuiin 2nd December. 2021 khan Aizawl-a iron rod (TMT Bar) zawrhna dawr hrang hrangte endik a ni a, iron rod zawrhte chu a size leh buk a tlin leh tlin loh enfiah a ni.

Iron rod hi a siamchhuahna-ah Bureau of Indian Standards chuan size bituk sa a nei a, chungte chu 6 mm, 8 mm, 10 mm, 12 mm, 16 mm leh 20 mm te an ni, Hei bakah hian a hmangtu turin a duh anih chuan size dang pawh siam a phalsak a ni.

Iron rod te hi a size azirin a rihlam tur hi BIS hian a bituk sa vek a, hemi bituk (range) chhung tal hi a phak loh chuan standard size a tling lo tihna a ni. Hei vang hian Controller of Legal Metrology chuan thuchhuah siamin iron rod zuarte chu electronic weighing machine hmanga buk vek thin turin thu a lo chhuah tawh a ni

Inspection team-te hi hmun li-ah an inthen a, hetah hian Legal Metrology offier-te kaihhruaiin Mizoram Police, Taxation Dept, Information & Public Relations Dept, Mizoram Consumers’ Union leh media lamte an tel a ni.

Hemi ni hian iron rod zawrhna dawr 47 (sawmli pasarih) endik niin tehfung tling pha lo iron rod zuar 41 (sawmli pakhat) hmuhchhuah an ni a, heng dawr atangte hian rod bundle 6,756 man a ni a, hei hi quintal 3,700 vel niin, Rs 2.42 crore man vela chhut a ni. Inspection team-te hmuh danin Mizorama iron rod siam leh lakluh tam zawk hian BIS tehfung an tling pha lo hle a. Tehfung tling tha iron rod te chu Tata Tiscon, Kamdhenu leh Kay2 Xenox brand te an ni.

Endik zingah hian iron rod brand 14 ( sawmpali) an tel a, chung zingah chuan SMS Steel Durgapur, Mega Turbo Durgapur, Sagar Durgapur, Lotus Durgapur, Trishakti Durgapur, Maithan Steel Durgapur, Zeecon Durgapur, Ssakti, Keshri, Datal leh AICOM brand te chuan BIS tehfung an tling pha lo tlangpui tih hmuchhuah a ni.

Inspection team te’n iron rod an man hi a size leh a rih zawnga tehfung an tlin loh vang ani hlawm a, a chak zawngah tehfung an tlin leh tlin loh erawh chu endik zui tura hmalak a ni. Endik hna hi chhunzawm zel tura tih a ni bawk.

BIS standard ang chuan iron rod (TMT Bar) sei zawng hi 12 meters aia tawi lo ani tur a ni a, an rih zawng tur chu 8 mm: 4.4 kg - 4.7 kg; 10 mm : 6.8 - 7.4 kg; 12 mm: 10.2-10.60 kg; 16 mm: 18.2 -18.9 kg leh 20 mm : 28.0 kg - 29.64 kg a ni a, he tehfung hi iron rod zawrhna dawrah sem vek a ni.

Controller of Legal Metrology chuan iron rod lei leh hmang turte chu digital weighing scale hmanga buk tir ngeia lei thin turin a chah a ni.