Ni 16, July 2015 (Ningani) Dar 10:30 AM khan Aizawl-ah lirnghing lo thleng thut thei laka chhanhimna hnathawh dan tur zirhona (Mega Mock Exercise & Emergency Drill) neih a ni. He nunchan zirna ah hian Aizawl District Disaster Management Authority (DDMA) hnuaia Incident Response Team a mawhphurhna nei Department hrang hrang bakah State leh District Emergency Operation Centre (EOC) te pawh activate a ni. He hunah hian Pu Shivaji Singh, Sr. Consultant, National Disaster Management Authority (NDMA), Govt. of India a rawn tel bawk.

He nunchan zirna ah hian lirnghing epicenter chu Aizawl atanga Hmarchhak Kilometer 10 a hla, Muthi khaw bulah awmin; leihnuai KM 30 a thuka intan leh Magnitude 7 RS a na niin chhut a ni a. Chawhma dar 10:30-a lirnghin zawh velah hian Incident Response System (IRS) kaihruaina angin mawhphurhna hrang hrang nei te chuan District Emergency Operation Centre (DEOC) an pan nghal a. Chutiang bawkin State EOC pawh State Level-a mawhphurhna hrang hrang changtuten an pan khawm bawk. Incident Action Plan (IAP) angin chanvo neitu hrang hrang ten chhanchhuahna leh chhawmdawl hna an kal pui a ni.

Incident Reponse System (IRS) hnuaiah hian mawhphurhna hrang hrang neitu Command Staff leh General Staff ruat anni a. State level-ah Chief Secretary chu Responsible Officer niin, Principal Secretary, DM&R chu Incident Commander a ni. Chutiang bawkin Aizawl district ah chuan Dr. Franklin Laltinkhuma, Deputy Commissioner chu Responsible Officer niin, Pu Lalchungnunga, Addl. DC chu Incident Commander a ni. Anmahni puibawm tur Officer thahnem tak ruat an ni a, Operation Section, Planning Section leh Logistic Section ah te then an ni. Chhanchhuahna hna thawktu ber, District Operation Section Chief chu Pu C. Laldina, SP, Aizawl a ni. Tun tum Mega Mock Exercise-ah hian an kaihhruaina hnuaiah District Incident Response Team ten an chanvo hrang hrang an ti chhin a ni.

He lirnghing hian Aizawl khawpui-ah chhiatna tam tak a thlen a, chhiatna nasa zual te chu hetiang a ni:

1) Leimin leh road block : Laipuitlang PHE Tuikhuah chhia-in a nghawng kal zelah leimin nasa tak siam in, Chandmari - Chaltlang kawng a block a. Vaivakawn - Temple Square kawng leh Treasury Square - College veng (Republic kawipui bulah) kawng te chu in chimin a hnawh bawk a ni. Heng hmunah te hian Site Incident Commander/Zonal Officer hovin Traffic Police, PWD leh PHED te an hmanrua te nen tirh nghal an ni.

2) Building pawimawh chim : Aizawl Civil Hospital Block-B (Blood Bank) & Block-H chhimlam te chu a chim a, New Market building pawh mipui tawt lai takin a sawi chhe bawk. Hei bakah hian veng hrang hranga School building 8 (pariat) a chim bawk. Civil Hospital building chima damlo te hi hmun him lam panpui an ni a. New Market leh School tinah hian Zonal Officer/Site Incident Commander hovin Task Force (Police, Traffic, MPRO, SDRF) te chu an hmanrua te nen chhanchhuahna thawk tura tirh an ni.

3) Kangmei : Millenium Centre, School Education Deptt. building, Higher & Technical Education building leh Govt. Boys Middle School (Sikul sen) ah te kangmei nasa tak a chhuak. Site Incident Commander/Zonal Officer hovin Fire & Emergency Services, Traffic, Police, SYS (Adventure Wing) te chu kangthelh tur leh chhanchhuahna thawk tura tirh an ni.

4) Casualty : Heng chhiatna avang hian thi 125 leh hliam nazual 120 an awm bakah hliam na vaklo mi 317 an awm anga chan chhin a ni. Chhiatna thlenna hmunah hliam te chu rang taka enfiah nghal niin, an natdan a zira thliarhran (Triage) a ni a. A hmuna enkawl theih bak hliam na zual te chu damdawiin hrang hrang (Aizawl Civil Hospital leh Private Hospital 4) pan pui an ni a. Hliam te hi damdawiin a enkawl sen an nih loh avangin Make-shift Hospital pahnih - Zotlang Mini Sports Complex & Venghlui Playground ah te siam a ni bawk.

5) Riot : Civil Hospital-ah hliam tam tak buaipui a ngaih avangin buaina a chhuak a, Police lam puihna koh hial a ni.

He Mega Mock Exercise hian Mizoram a Drill lo neih tawh thin zawng zawng aiin a huap zauva, State Disaster Management Authority (SDMA), Aizawl District Disaster Management Authority (ADDMA)/DC Office, Disaster Management & Rehabilitation Department, Fire & Emergency Service, Police, MPRO, Traffic, PWD, PHE, Health Deptt., State Disaster Management Force (SDRF), NDRF (Delta One Team, Sakawrtuichhun), Youth Adventure Clubs (Sports & Youth Services Deptt.), Central YMA, Private Hospital te bakah IRS-a mawhphurhna nei department hrang hrang hrangte an tel. Tin, chhiatna thlenna hmun Local Council (Locality DM Committee), Department Officials, New, Market & Millenium Centre-a thawktute leh sumdawngte bakah School naupang leh zirlaite’n an chanvo hrang hrang an ti chhin a ni

He nunchan zirna ah hian mi 600 (zaruk) chuang an tel a ni.

He drill hi State leh District Disaster Management Plan enchhinna pawimawh tak a ni a. Aizawl hi lirnghing na tak tuar thut thei reng, India rama khawpui hlauhawm ber zinga mi anih avangin Incident Response Plan tha tak neih leh enchhin fo hi a tul em em a ni.