Nimin khan Chief Minister Conference Hall-ah Pu Lal Thanzara Health & Family Welfare Minister leh Health Department hotute chu thu pawimawh hrang hrang sawihovin an thukhawm.
He Meeting pawimawh takah hian Medical College chungchanga hmalakna te thlir ho a ni a. State Referral Hospital pawh khum 300 awm theih nana hmalak a nih thu te sawiho a ni a, Nodal Officer atan Dr. Jane R.Ralte chu ruat a ni bawk. State Referral Hospital-a Multi Disciplinary Research Unit siam mek changchang te pawh thlir ho a ni. Doctor transfer leh posting chungchang bikah Department Transfer Norms thar anga kal a nih tur thu leh hemi atana a rang thei ang bera hmalak tura tih a ni.
Mizoram pawn lama damlo refer-na MR bill tam lutuk tih kiam nana MR bill tih tlem dan kawng te, damlo kalpuitu (Attendant)thleng pawhin bituk chinte khauh lehzuala kalpui ni se tih a ni a. He lama Finance Department in zirchiangtu committee a din pawh thurawn pek ni se ti a rel a ni.
IMR leh MMR chungchang sawihona ah Saiha leh Lawngtlai lama nau piang thihna leh nu nau chunga thihna te a lo tlem zawk theih nan tanlak lehzual dan tur pawh sawiho a ni a. Health Minister duhdan angin hmanraw tha zawk leh changtlung zawka heng IMR leh MMR sanna hmun te hi thuam a, nasa leh zuala Awareness pek ni se tih a ni a. Zirchianna atanga a landan angin nu leh nau thihna tam ber hi Nutrition dik tak hmuh loh vang te, zuk leh hmuam tih nasat vang te in nu leh naute ah Thisen tlakchhamna (Thiamine Deficiency) a thleng thin a. Chuvangin Ei leh in, tui in tur thianghlim, damdawiina nau neih ngaih pawimawh leh zuk leh hmuam kawnga insum a tulzia nasa lehzuala in hrilhhriat ni se tih a ni bawk.
Health Worker chungchang sawi ho na-ah Health Worker post semrual tawk loh avanga mipui ten harsatna an tawh thin avangin rualkhai zawka posting siam that ni se ti a rel a ni bawk.
Heng bakah hian tunlaia mahni intih hlum (suicide) hluar ta lutuk ven dan tur zirtirna kawng hrang hrang te, hmanraw thar changkang zawk hmanga Civil Hospital ICU thuam that dan tur te pawh relho a nih bakah, Mizoram State Cancer Institute-a Radiotherapy Technologist post thar pahnih siam belh turin thu tih tluk a ni bawk.
