DIRECTORATE OF INFORMATION & PUBLIC RELATIONS, Government of Mizoram, India

Vawiin hi UNISDR - International Disaster Reduction Day a nih angin Aizawl District Disaster Management Authority (ADDMA) bultumin Aizawl DC Office, DC Staff quarters, Solomon’s Cave Market leh Dawrpui Centenary School-ahte lirnghingin chhiatna a thlen thulha chhawmdawlna hna thawh dan tur enchhinna, Mock Drill neih a ni.

Aizawl District Emergency Operation Centre (DEOC)-ah lir a nghin thu hriat a nih veleh siren tihrik a ni a. DEOC atang hian ADDMA Chairman, Aizawl DC Pi A.Muthamma hovin chiatrupna thlen thulha mawhphurtu hrang hrang - National Disaster Response Force, State Disaster Response Force, Fire & Emergency Services, Hospital, MPRO, Police safety team, Traffic Police, PWD, Power & Electricity Department ah te chhiatna thlenna hmun leh thlen dan rang takin hriattir an ni a. Chung ho chuan an tihtur tulte tiin chhiatna thlenna hmun li (4)-te hi an pan nghal a, a hmuna awmsa YMA leh Local Council-te nen thawkhovin chhanchhuah hna hi an thawk nghal a ni. Chhiatna thlenna hmunah hian hliam tuarte chu a hmunah bawihsawm nghal an ni a. Hliam na zual, damdawi in pan pui ngaite chu Ambulance leh taxi remchang apiangin rang taka damdawi in pan pui nghal an ni.

ADDMC Chairman, MPRO leh mi pawimawh dangten Aizawl DEOC hi an thutchilh a. Incident Commander ruatsa ten chhiatna thlen dan te, thi leh hliam tuar zat te leh a tul apiang a khat tawkin an hriattir reng a. Heng an thu dawnte hi thuthar thehdarhtute leh mipui hriattura puanzar nghal zel a ni bawk.

Mock drill hi minute 30 atanga 45 bawr velah zawh fel vek a ni a. Aizawl DC Conference Hall-ah ADDMA Chairman hovin mock drill neih dan thlir letna hun hman niin a kaihhnawih department aiawhte leh mawhphurtu dangte an tel. Review meeting-ah hian member kal khawm ten an hmuhdan sawihovin felhlel lai leh siamthat ngai nia an hriat te siamthat dan tur leh hmasawn dan tur rawtna te an ngaihtuah a ni. ADDMA Chairman Pi A.Muthamma chuan mock drill neih zawh taka mawhphurtute, khawtlang hruaitute leh school hotute hnenah lawmthu a sawi bawk.

Chhiatna (disaster) thleng a awm a nih chuan Aizawl DEOC phone number 1077 emaw 2317717-ah englai pawhin biak pawh theih reng a ni.

Attachment