4798/2025-2026

Dated Aizawl, 12th March 2026 : Vawiin khan North Eastern Regional Power Committee (NERPC) Meeting vawi 31-na chu, KTP Youth Recreation Centre, Falkland, Aizawl-ah neih a ni a. Power & Electricity Department Minister F. Rodingliana’n hun hmanpuiin, Meghalaya Power Minister leh NERPC Chairman ni bawk Metbah Lyngdoh te, NERPC Member Secretary B. Lyngkhoi te bakah hmarchhak state hrang hrang atanga mi thiam leh hotu lian tak takte he hunah hian an tel a. Energy-a intodelhna tur te, kawlphetha leh infrastructure lama hmasawnna tur chungchangte sawi ho a ni.

P&E Minister Pu F. Rodingliana chuan, NERPC meeting hi Mizoram-in a vawi khat thlenna a nih thu leh lawmawm a tih thu sawiin Power & Electricity lama Mizoram hmasawnnate tarlang a. Mizoram chu Ministry of New & Renewable Energy-in tun hnaiah North East-a che tha ber pawl (best-performing states) zingah a puan thu sawiin hman tangkai loh hausakna (untapped wealth) a neih hnem thu te, CWC survey report-ah pawh Hydro Power 3,660 MW siam chhuah theihna a neih thu te, Pumped Storage Project (PSP) ah pawh 10,000 MW aia tam siam chhuah theihna a neih thu te leh NISE report-ah pawh tarlan a nih danin nizung chakna atangin 9.09 GW siam chhuah theihna a neih thute a sawi bawk a. Heng theihna nasa tak Mizoram-in a neihte hi a taka thar chhuah a nih zel theih nan hmalak mek zel a nih thu sawiin, thawh hona tha a ngaih pawimawh thu a sawi bawk.

Tun dinhmuna Mizoram P&E department hmalakna langsar zual tarlante chu:

• Power Generation Progress: Tuirini Hydel Project (24 MW), NDB funded niin hna thawh tan a ni tawh a. Tuivai HEP (132 MW) leh Tlawng HP (102 MW) te tan Detailed Project Reports (DPR) peih fel thawkhat a ni tawh bawk.

• Solar Expansion: December 2025 khan Thenzawl Solar Plant (10 MWp) hawn a ni a. Sumsuih-ah 5 MWp plant siam mek a nih bakah, 46 MWp dang siam leh turin tender buaipui mek a ni bawk.

• Grid Infrastructure: Chite Aizawl Sub-Station leh 132kV Bairabi-West Phaileng line te hawn a ni tawh a. Lawngtlai, Marpara, leh Thingsulthliah sub-station tharte chu March 2026 hmaa zawh hman tum a ni.

• Modernization: RDSS scheme hnuaiah Prepaid Smart Metering leh Aerial Bunch Cables (ABC) te Aizawl khawpui chhungah hman tan a ni a, hei hian kawlphetha hloh tur a ti hniam dawn a ni.

Heng bakah hian Minister F. Rodingliana chuan Central Sawrkarah power sector bik tan Gross Budgetary Support (GBS) chu 10% atanga 20% a dah turin leh ramngaw hman man Net Present Value (NPV) rate sang lutuk chu tih hniam sak tura a lo ngen tawh thu a sawi bawk.

Meghalaya Power Minister leh NERPC Chairman ni bawk Pu Metbah Lyngdoh pawhin thu sawiin North Eastern Region-hote transmission & distribution loss sang lutuk chu a ngaimawh thu sawiin India ram average ai maha kan san thu sawiin tan kan lak nasat a ngaih thu a sawi a. Hei bakah hian hmasawnna hna thawh nana forest hman man/tih chereu man Net Present Value – NPV charge sang lutukin NE state, Forest cover tamna ramte tan hmasawnna hnathawh a tih thuanawp nasat thu sawiin NPV senso hi Central sorkarin a tum emaw, a nih loh leh, ramngaw neih tam dan azir emawa he chawi tur bituk hi tih hniam ni se tiin a rawt bawk.

Member Secretary B. Lyngkhoi pawhin NERPC chu mipui tana kawlphetha rintlak leh man tlawm zawk a awm theih nana inrawnkhawmna hmun pawimawh ber a nih thu sawiin ‘hmasawnna hna hrang hrang thawhnaah power sector chu a hmahruaitu a nih a ngai’ a ti bawk.

NERPC Meeting vawi 31-naah hian hma lak ho theihna dan tur hrang hrangte rel niin India hmarchhaka ramngaw leh tui chakna te chu hlawk tak leh dik taka hman a nih theih dan turte sawi ho a ni.

NERPC hi India hmarchhak State 7 te'n power supply hnianghnar leh rintlak an neih theih nan Electricity Act, 2003 hnuaia din a ni.