4799/2025-2026

Kolasib, 12th March, 2026: Tunhnaia social media-a Assam lam mi thenkhatin Saipum ram chhunga lo vat a hma an la nia thehdarh a nih chungchang bawhzuiin, nimin khan Kolasib Bawrhsap Pu Robert C. Lalhmangaiha leh Senior SP Pu Lalrinpuia Varte te chuan Saipum khua tlawhin, he harsatna thleng chungchangah hian Saipum khawtlang hruaitute nen thil awmdan an sawiho.

He hunah hian Saipum khawtlang hruaitute chuan thil thlen dan tlangpui tarlangin, hnam dang ten lo vah nana hmun an rawn ruahman hi a hma chuan Mizoram sorkar hnuaia Police te duty-na thin, Chawilung Camp awmna hmun a nih thu an sawi a. Kawng chhiat avanga he hmuna Police duty te an awm theih tak loh hnuah, venhimna hna a lo chak tawk ta lo chu remchangah lain Assam lam atang hian an rawn zuam ta niin an ngaih thu an sawi bawk.

Kolasib Bawrhsap chuan he thil thleng hi Sorkar pawhin a ngaipawimawh hle tih sawiin, buaina leh inepna chhuak lova boruak muanawm tak hnuaia chinfel a nih theih dan kawng zawn chu thil tul hmasa a nih thu a sawi a. A tul ang zela hma la turin sorkar a inhuam thu khawtlang hruaitute hi a hrilh nghal a ni.

Saipum khawtlang hruaitute chuan he hmun hi an pual ram, Saipum ram ngei a nih thu uar takin an sawi a, Assam lam atanga he hmalakna hi an kalpui tlang zel a nih chuan nakin zelah ramri buaina hlawm lian zawk a chhuah theih dawn thu an thlen a. Sorkar chu a hma thei ang bera hma la turin an ngen a, remna leh muanna nena he harsatna chinfel a nih theih dan tur kawng hrang hrang an sawiho nghal bawk a ni.