3394/2022-2023

Aizawl, dated the 27th January 2023: Vawiin chawhma dar 10:00 am khan Mizoram chhunga 5G Network Roll Out hmalakna kal zel atan Mizoram Sawrkar, ICT Department leh Department of Telecommunications, Govt. of India tangkawp te buatsaihin Secretariat Conference Hall, Main Building, MINECO, Aizawl-ah ‘One Day State Level Workshop on 5G Roll out’ neih a ni.

He Workshop ah hian Pu Syed Musawwir Ali, IAS, Special Secretary, ICT Department chuan kalkhawmte lawmna thu sawiin, workshop neih a nih chhan leh a kaihhnawih tul dangte a sawi a. ICT Department chuan Mizoram-ah Internet connectivity tha zawk kan neih nan a chak takin hma a la mek a, 5G service kan hman ve thuai theih nan 31st October 2022 khan Sawrkar-in ‘Working Committee for Roll out of 5G Network’ a din tawh bawk a ni, Ni 30.11.2022 khan Chief Secretary ho in meeting neih a ni a, Ni 6.12.2022 khan ICT Minister, Pu Robert Romawia Royte kaihhruaina in ‘consultative meeting on Readiness of 5G’ pawh neih tawh a ni.

He nikhat awh Workshop ah hian Department of Telecommunications, Govt. of India atangin Pu Neeraj Kumar, Dy. Director General (National Broadband Mission) leh Pu C. Lalhmachhuana, Director, NELSA, te rawn telin; Mizoram Sawrkar hnuaia ICT Department Official-te bakah, P&E Department, UD&PA Department, AMC, Aizawl Smart City Ltd., Transport Department, Agriculture Department, Horticulture Department, DC Aizawl, NIT, NIC, ICFAI BSNL, COAI (Cellular Operators Association of India), DIPA (Digital Infrastructure Providers Association), Indus Towers, ATC Towers, Reliance Jio leh Airtel aiawh Official pawimawh thahnem tak an tel a ni.

Pu Neeraj Kumar, DDG (National Broadband Mission) (NBM) chuan 5G service chungchangah presentation pe in ‘5G network, fifth generation telecom network technology’ chu internet speed chak leh bandwidth sang tak a nih thu leh, he 5G technology hi kan hmang thei a nih chuan mipui ten kan nitin nun leh khawsakna bakah kawng hrang hrang – Transport sector, Health, Industry, Agriculture & Livestock, Disaster Management and safety, Smart city hmalakna leh Education sector bakah kawng tamtak ah hmasawnna thlen thei tu a ni dawn tih a tarlang a ni. Kalkhawm ten an hriat chian leh hriat belh duh te zawtin inhrilhfiah a ni bawk.

Hei bakah hian Prime Minister Gati Shakti Portal leh Call Before You Dig (CBuD) Mobile applications tun hnaia Central Sawrkar in a buatsaih leh hman tan mek chungchang sawifiah a ni bawk a, CBuD hian a tum ber chu Cable hrang hrang leh pipelines lei hnuaia phum hna thawh a nih avanga mipuite leh agency te tana harsatna awm thin hrang hrangte sutkianna tura buatsaih a ni a, lei hnuaia cable emaw pipeline emaw phum turte chuan mobile application CBuD ah an in register hmasak vek a ngaih dawn thu leh enkawl tuten permission an pek hmasak a ngaih tur thu te tarlan a ni.

Workshop ah hian Pu C. Lalhmachhuana, Director, NELSA, DoT, Govt of India pawhin presentation pein telecommunication service chungchanga Mizoram dinhmun te sawiin, Mizoram chhung a Mobile connectivity tih changtlunna tura hmalakna kal mek te leh harsatna awm thin hrang hrangte a sawi lang a ni. Tin, tun hnaiah Central Sawrkar in OPGW/ADSS OFC connectivity hmanga Mizoram a District leh Block zawng zawnga telecom connectivity tihchangtlunna atan sum hmuh a nih thu te, hna thawk tura ICT department an inbuatsaih mek thu te a sawi lang bawk a ni.

Mizoram-a 5G hmalakna te pawh Airtel leh Reliance Jio hnen atangin ngaihthlak a ni bawk a, hun reiloteah 5G hi an launch tur an sawi a ni.

He workshop hi Dr. Lalthlamuana, Chief Informatics Officer, ICT Department lawmthu sawiin hun a khar a, ‘5G network’ hman thuai a nih theih nan a a kaihhnawih department leh organization te lungrual tak leh mahni zawn theuh a theihtawp chhuah turin a sawm a ni.