Ni 25.2.2012 (Inrinni) tlai dar 5.00 khan SBI Regional Cultural Meet chu Vanapa Hall, Aizawl-ah neih a ni a; he hun hi SBI Circle Welfare Committee, Mizoram huaihawt a ni. FCS&CA Minister Pu H. Rohluna chu khuallian a ni a; Pu K. Lianzuala, MLA, MKVIC Chairman chu khualzahawm a ni.

                Pu H. Rohluna chuan, “State Bank of India chauh hi Mizoram pum dap chhuak, sawrkar account khawihtu leh mipuite sum enkawltu nationalized bank kan neih a ni a; branch 28 zet Mizoram-a a inzarpharh hi a lawmawm tak meuh a ni. Mizoram sawrkarin a hnuaia thawkte hnena a pek vek theih loh housing loan leh lirthei loan in pe chhuak thin hian nasa takin sawrkar ko a tizang a ni” a ti. Supply Minister Pu H. Rohluna chuan, “SBI hi PMEGP scheme khawihtu ber in ni a; he scheme hi thalai lehkhathiamte tana mahni kutkea eizawnna kawng zawhna tura sum hnar pawimawh tak a nih avangin a tihhlawhtlinna kawngah tun aia SBI-in tan a lak hi a pawimawh tak meuh a ni” a ti.

                SBI hi kum 200 zeta upa a ni tawh a; Mizoram leh hmar-chhak state dang pasarihte chu North east Circle hnuaiah a awm a ni. SBI hian kum khata an hlawkna atangin  hnathawkte intihhlimna tur leh infiamna tur sum a serh hrang thin a; bank kum kal laiah pawh hian infiamna chi hrang hrang hmar-chhak state-ah an buatsaih tawh a ni. Regional Cultural Meet hi Aizawl-a vawi khat nghahna a ni a; Mizo hnam lam chi hrang hrangte bakah Biju Dance (Chakma) te, Gurkha Dance te entir a ni a; solo leh rimawi tumte pawh ngaihthlak tur a awm a ni. He cultural meet pual hian SBI hnathawkte leh an chhungte chuan zanriah an kilho a ni.