Vawiin khan Finance Minister Pu Lalsawta chuan MZP General Hqrs. buatsaih Zirlaite Ni lawmna leh MZP din champhaphak lawmna inkhawm chu I&PR Auditorium ah a hman pui.
Pu Lalsawta chuan Mizoram hi a awm na hmun a rem lova, ram leilung hausakna haichhuah tur awm rih lo mahse khawvel inher chho zelah mihring thluak thil tihtheihna tihpun a lo pawimawh chho zel a. Mizo fate hi hemi kawngah hian hnamdangte aiin kan hniam bik lova, kawng danga kan hnufualna hian kan thlen tur ram kan thlenna kawngah engti zawng mahin min dal zo dawn lo, a ti. Pu Lalsawta chuan ram dang, changkang zawk leh hausa zawkte umphak turin Zofate inpek thar a ngai a, he ram hi ram nuam taka siam turin Pathianin Mizo thluak thiamna leh finna min pek tipung leh tithanglian turin kan vaiin mawh kan phur a ni, a ti. Kum tam tak chhung zirna kawnga Mizo fate harsatna lo sukiang tawhtu MZP te chu fakin zirlaite hmakhaw thlirna thui tak an lo neihpui avangin kan ram leh hnam tan hna tangkai tak an thawk thin a ni, a ti bawk.
Vawiin programme MZP Vice President Pu Lalsangzuala Ngente kaihhruaiah hian an President Pu Lalhmachhuana chuan zirlaite fuihna thu sawiin ram leh hnam hmasawnna turin rinawmna leh taihmakna nen, nakin hun thlir chungin, Mizoram tana chhenfakawm, hnam malsawmna thlentu ni tum theuh turin zirlaite a chah a. Ram chhung leh ram pawna Zohnahthlak unaute kuahkhawmtu ni thei turin nu leh pa chanchanga rilru zau tak pu turin a sawm bawk.
MZP hi October 27, 1935 khan din niin kum 2006 khan sorkar chuan October 27 hi Zirlaite Ni atan a puang a. He ni hi zirlaiten an zirlai piahlama hriattur pawimawh leh nun dan mawi in zirtirna atan an hmang thin a ni. Vawiinah hian thupui atan ‘Vaihlo (zuk leh hmuam) that loh zia chungchang zirtirna pek darh’ tih chu an hmang a. He thupui hmang hian Mizoram State Tobacco Control Society (MSTCS) Project Coordinator Pu R.Lalremruata chuan thu a sawi a. A ni hian zirlai kalkhawmte hnenah zuk leh hmuam that lohzia leh hriselna a nghawng chhiat nasat dan te a zirtir a ni.
He programme ah hian tunhnaia Mizo tlangval College of Agriculture & Horticulture, Pasighat Arunachal Pradesh a B.Sc. (Horti) zirlai Lalmuankima Tlangnuam veng boral ta sunna hun an hmang bawk.
