Chief Minister Pu Lal Thanhawla chuan vawiin khan Vanapa Hall-ah Mizoram Information Commission (MIC)buatsaih Right to Information (RTI) Week a hawng.

Chief Minister chuan RTI hi mipuiten sorkar khalh ngil nan tun aia nasa zawk hian hmang tangkai se a duhthu a sawi a. Tuna Mizoram Information Commission hotute chu sorkarin uluk taka mi tha leh hlemhle lo a dap kual hnua a dah an nih thu a sawi a. Chief Minister chuan kan ramah dikna a lal ber theih nan MIC enkawl turin mi tha leh dik an awm a ngai a, mi corrupt te awmna chi a nilo a ti a. RTI hi mipui ten sorkar kalphung leh hnathawhte an hriat theihna tur leh sorkar dik leh langtlang, mipuite ngainat leh mawhphurhna la ngam an siam theihna leh eiruk venna hmanrua pawimawh tak a ni a ti.

Chief Minister chuan hna kan thawhna hmun theuhte hi a enkawltu hotulu ber ten endik thin se tiin, tunhnaia Guwahati a Indian Super Leaque Football inkhel a en tum ah Police hotulu ber ber thlenga an duty thu a sawi a.Mipuite himna tur leh hamthatna tur chuan tih loh tur a awmlo a ni a ti a, hotu lu hlei hlei hi inpe a, thawk chhuak thin tur an ni a ti. Mizoramah thil tha kan neihte hi mi thiltithei leh hausaten an neih deuh zel avangin mipuiten a hamthatna an dawng phak ngailo a ni a ti a. Kan ramah eirukna hian zung a kaih thuk tawh a ni tiin, eirukna hi sorkar sum eiruk chauh a kawklo a ti a. Thatchhiatna te, zelthelnate, mahni hnaa tui lohte, kuttlinglo a sum lak hreh lohna te a huam vek a ni a ti a. Sorkar ringawt chuan kan inveng seng lova, mipui leh media lam te hian RTI hmang tangkaiin min venpui thei a ni a ti.

Chief Minister chuan a tlangpuia sorkar hnathawk Mizote hi kan inthlahdaha a hriat thu a sawi a. Property Returns te kan ngaihpawimawh tawk loh thu sawiin, khawih chet theih lei dawn a kan sum neihzat ziak langa sorkarah thil kan lei hmaa phalna kan lak hmasak a tul thute a sawi a. Hengte hi hnamdang chuan an tih laiin keini chuan TV leh car te hi kan kuhvakhawr lei mai a ni a ti a. In siam that kan mamawh hle a ni a ti. Chief Minister chuan RTI in a thil tumte tih hlawhtlin anihna turin, mi zawng zawngin nasa lehzuala hmang tangkai turin a chah nawn a, ‘kan hman tangkai zawh poh leh keimahni hamthatna tur a ni’ a ti a. Rinawmna leh dikna nena thawkte hnenah Pu Hawla chuan lawmthu a sawi a, zelthel te chu tan la thar turin a fuih bawk a ni.

Hawnna inkhawmah Pu Laldingliana,IFS (Rtd), Chief Information Commissioner chuan RTI hi hman tangkai deuh deuh anih theihna tura Chief Minister Pu Lal Thanhawla’n a phurpuizia thu a sawi a. Zirna In, MZU leh College hrang hrangah subject pakhata zir mek a nih thu a sawi a.Sorkar nen pawha an thawhhona a that thu a sawi bawk a. RTI chu inhekna anih loh thu uar taka sawi bawkin, RTI chu dik leh langtlang sorkar siam mai bakah sorkar chak leh mawhphurhna la ngam, eiruk venna hmanrua pawimawh tak a ni a ti.

Pu Jim K.Chozah, Director, Information & Public Relations pawhin MIC Nodal department Director anihna anga thu sawi bawk in, RTI chu democracy tha tak siamna a ni a ti a. Mizoramah RTI hmang tura mipui hnena tlangzarh, awareness a tha tawkloa a hriat thu a sawi a. Mi thenkhatin an nel loh bakah an hlau thin a ni a ti a, Pu Jima chuan RTI hi hlauh tur anih loh thu leh sorkar kalphung leh hnathawhte dik taka hriatna anih zawk thu a sawi bawk.

RTI Act hi Mizoramah kum 2006-07 atanga ni 1.9.2014 thlenga zawhna (applications) lut tawh zawng zawng chu 6571 a ni a, 1st appeal ah 91, 2nd appeal ah 42 leh MIC a appeal zat chu 89 a awm tawh bawk a ni.

Attachment

  • Loading attachment...