Vawiin chhun dar 11:00 khan Champhai-ah RTI Week hawnna inkhawm, I & PR Conference Hall ah neih a niin he Week hawnna inkhawm hi Pi K.Laldingliani DIPRO in a kaihruai a, he huna khuallian Pu Zoengsanga Addl. DC, Champhai chuan thu sawiin Sorkar Officer te chu an tana zawhna chhan nuam lo leh tha lo chu ' i ti lo mai ang u' tiin a sawm.
A sawi zelnaah Pu Zoengsanga chuan Sorkar hnathawk te chu Sorkar Chhiahhlawh (Servant) kan ni a, miropui tak kan ni lo a, Mipui tana hnathawk kan nih angin rawng kan bawl sak mipuite lakah inluling, chapo leh inchhuang thei kan ni lo tih hria ila, tuna kan hnathawh theuh pawh hi mipuite vanga thawk kan ni a,kan hnathawhna zawnah theuh sorkar kut ke kan ni tih hriain hawihhawm takin i thawk ang u a ti.
RTI Act chungchang sawiin Pu Zoengsanga chuan Kum 2005 khan India ramah RTI Act duanchhuah a niin Kum 2011 atangin he dan ropui tak hi hman tan a ni a, Eiruk leh hlemhletna dona kawngah te, mipui ten sorkar hmalakna an hriat zung zung theih nan te, fel fai taka ram rorelna a kal theihna turin he RTI Act hi a tangkai em em a, Department tinte chu kan hmalakna website ah pho chhuak tur kan niin a la ti ve lo te pawhin kan tih fel thuai a ngai a, miin RTI Act hmanga zawhna an zawh chhan duh loh leh chhan that loh chu Dan bawhchhiatna a nih avangin ni 30 chhunga chhan fel ngei a ngai tih hre thar leh tur leh zawhna zawttu mipuite pawhin an zawhna te chhang tura sorkar official te nawr tut tut lo turin a sawm a, phuba lak duhna leh tute emaw tih mualpho duhna lam zawhna zawt lovin, mipui leh ram tana tangkai thei thil te zawt thin turin he huna kalkhawmte chu a sawm bawk a ni.
Dr. C.Laldinthara, Secretary, Champhai District NGO Coordination Commitee in Keynote Address pein RTI Act chungchanga mipuite hriat tur pawimawh zualte a sawilang a, chumi hnuah zawhna leh chhanna hun hman a ni a, he hunah hian Champhai a Sorkar Official pawimawh leh mipui aiawh VC Member te leh NGO aiawhte an kal tha hle.
