Aizawl Art Gallery buatsaih ‘Painting Exhibition - 2009’ chu 17th Oct.2009 Inrinni  chhun dar 12:00 hian Art & Culture Minister Pu PC. Zoramsangliana’n a hawng dawn. Fine Arts lama Aizawl Art gallery hmalakna hian mipui ngaihhlut a hlawh thin hle a, tun tuma Painting Exhibition 2009 an buatsaih tur pawh hi mi thahnem takin an tlawh leh tura beisei a ni.

Painting Exhibition - 2009 Vanapa Hall-a neih turah hian Aizawl Art Gallery neitu Pu Tanpuia chuan inbuatsaihna tluang taka an kalpui thu sawiin, Artist 23 in an kut chhuak 170 an pho chhuak dawn a, Oil Painting, Water Colour Painting, Pencil Drawing, Charcoal Drawing te hmuh theihin a awm anga. Heng zingah hian Zai leh hlaphuah lama zofate hmelhriat Jeremi Zobiaka (JB-a) Kum 1999 a boral ta in lemziak lama sulhnu a lo neihte pho chhuah a nih tur thu a tarlang bawk a ni.

Painting Exhibition -2009 hi 23rd Oct 2009 (Fri) thlengin a duh apiang tan tlawh theih a ni ang a,  lemziak pho chhuah te hi Art Gallery atanga an hralh chhuah aia man tlawm zawkin lei theih a ni dawn a ni. Art & Culture Department chuan Fine Arts lama Aizawl Art Gallery hmalakna hi chhuanawm a tih em avangin Vanapa Hall hi sum sen ngai lovin duhsak taka a hmantir bakah Painting Exhibition-2009 hlawhltin nan hian theih tawp chhuahin a tawiawm bawk a ni.