No.6238/2020-2021

Vawiin chawhnu khan Aizawl Bawrhsap Pu R.Lalramnghaka hovin Pradhan Mantri Van Dhan Yojana (PMVDY) chungchangah District Level Co-ordination & Monitoring Committee, Aizawl DC Conference Hall-ah an thu khawm.

Aizawl Bawrhsap Pu R.Lalramnghaka chuan Van Dhan Mission bul tum bulpui ber chu Tribal ten an chhehvel a ramngaw hausakna awmze nei leh Tribal ten an chhehvel ramhnuaia thil thar chhuah te an mahni ngeiin an sawngbawk a, a hralhna thleng a an kutken theihna tur scheme a nih thu a sawi a. India ram chhunga Tribal te thil thar chhuah hi ramhnuai atanga lak Minor Forest Produce (MFP) kan tih mai te hi Tribal te inngahna berte zing a mi a ni a, MFP hrang hrang atang hian eitur leh damdawi lam chi te siam nan tangkai taka hman a ni, a ti a. Researcher te sawidan chuan India rama Tribal te hian an sum hmuhna 20-40% hi MFP atanga an hmuh niin an chhut a, Mizoram-ah pawh Society hrang hrang-in a enkawl Self Helf Group ten tangkai taka Van Dhan Mission hi Aizawl District-ah hman tangkai a nih theih nan, Department hrang hrang hnuaia hmachawp inang te sawi ho a, tanrual a theihna a tanrual thiam a pawimawh thu a sawi a ni.

Meeting hian central sawrkar-in a duan angin Training leh hnathawhna tur hmanrua tenau SHG pakhat zelah Rs. 1,00,000 (nuai khat) hman a rem ti a ni. SHG pakhat zelah training atan 33% leh hmanrua lei nan 67% hman tura ruahman a ni. SHG pakhat ah member 20 zel awm turin SHG 15 ten Kendra (Centre) pakhat siam tur a tih a ni a, Kendra pakhat atangin MFP lakkhawm dan tur te, sawngbawl dan tur leh hralh chhuah zel dan turte Kendra awmna hmuna zirin zirchian leh ni se an ti.

Ni 23.1.2020 khan Mizoram-ah Van Dhan Scheme hman a nih theihna turin MoU ziah a ni a, he MoU hi Secretary, Ministry of Tribal Affairs, Govt. Of India aiawhin Regional Manager (NER) TRIFED, Gwahauti leh Secretary, Co-operation Department Govt of Mizoram ten an ziak a ni. Van Dhan Scheme chungchanga Mizoram-a hmalakna-ah Nodal Department atan Co-operation Department chu thlan a ni.