Vawiin khan Aizawl bawrhsap Pu Vanlalngaihsaka hovin Aizawl DC Conference Hall ah Aizawl DC office-a officer-te leh Republic Day lawmna a chanvo leh mawhphurna nei Department leh pawl hrang hrang aiawhten tun thla (January) ni 26-a Republic Day vawi 71-na, lawm dan tur an rel.

Vawiin meeting hian kumin Republic Day hi Pathianni a nih avangin kum dang anglo deuhin zing dar 7:00 ah Larsap hovin AR Ground, Aizawlah Republic Day lawmna hi neih an rel a ni.

Vawiin thutkhawmah hian Department hrang hrang leh tlawmngai pawl hrang hrangte chanvo leh mawhphurna siamfel a ni a. Ceremonial Parade practice neih dan tur chungchang te, parade-a tel tur zirlai naupang ho hriselna dinhmun endik chungchangte leh thil tul dang chi hrang hrangah ruahmanna siam nghal a ni. Parade practice hi January ni 21 atanga tan tura ruahman niin January ni 24 ah final rehearsal neih a ni ang.

Ruahman lawk dan chuan kumin Republic Day Ceremonial Parade ah School Contingent 14, Armed Contingent 7, NCC Contingent 4, Scouts & Guides Contingent 1 ve ve, Ex-servicemen Contingent leh Band Party 4 (Brass Band 2 leh Pipe Band 2) beisei an ni. Armed Contingent ah hian Paramilitary forces – Assam Rifles, BSF leh CRPF contingent te pawh tel tura beisei an ni.

Republic Day zingkarah MHIP Gen. Hqrs. bultumin Aizawl khawchhung a Home hrang hrang 7 ah Republic Day pual thilpek hlan a ni bawk ang.

AR Ground a hun hman zawh a nih hnu chhun dar 12:00 ah sawm bik te tan Governor's At Home, Raj Bhavan ah neih a ni ang.