Mizoram Sawrkar I&PR Department buatsaih Departmental Press Tour a thang tur I&PR official 3  leh MJA  member 8 te chu Additional Secretary, Finance Pu Ramchuana chuan I&PR Office kawtah vawiin chawhhma khan a vai liam a. Sawrkar buatsaih, Press Tour a kal te hian Bengaluru leh Mysuru khawpui te an tlawh dawn a ni.

Departmental Press Tour a kal tur te pual hian I& PR Director Roomah inthlahna hun tawi buatsaih a ni a. He hunah hian Additional Secretary, Finance Pu Ramchuana leh Pi Lallianpuii, Director, I&PR hnen atangin fuihna thu ngaihthlak a ni a. Pu Ramchuana chuan State lian leh phuisui zawka zin tur an nih avangin journalist-te chu an zinna hmunah kalphung leh tih dan tha zawk an hmuh te zir a, Mizoram chhunga lakluh ve theih a ni em tih te zirchiang turin a fuih a. Mizoram hmasawnna atana tangkai tur sawrkar leh mipui ngaihtuahna kaihruaia ti zau thei turin an thil zirchhuahte mipui hriatah puangzar turin a chah a ni.

I&PR Director Pi Lallianpuii chuan journalist-te chu mipui ngaihtuahna sukthlek dan kaihruaitu pawimawh tak an nih avangin sawrkar pawhin sum tam tak sengin Departmental Press Tour a buatsaih thin, a ti a. District hrang hranga awm an nih angin an haw hunah an awmna hmun theuha an thil zirchhuahte zau taka thehdarh turin a chah a ni.

Mizoram Journalist Association hruaitu lam atangin Pu Lalremsiama, Vice President pawhin thusawina hun a hmang bawk. Bengaluru leh Mysore Departmental Press Tour hi Pu Lalramliana Chawngte, Joint Director, I&PR chuan a hruai dawn a ni.