Directorate of Information & Public Relations a thawk officer leh staff te chuan vawiin chhun khan I&PR Auditorium ah kumthar atana inhlantharna hun urhsun takin an hmang.

He inhlantharna hun Pu C. Lalnunkima, Jt. Director kaihhruaiah hian I&PR Director Pi Lallianpuii’n fuihna thuchah sawiin department khata thawkhote chu chhungkua an ni tih inhre reng tura a duh thu a sawi a, kum kalta chhunga Department hmalakna hlawhtlinna chi hrang hrang tarlangin Department a thawktu zawng zawng te tanrualna leh thawhhona tha rahchhuah a ni a ti a, kum thara Department in ram leh hnam hmasawnna tura hmalakna hrang hrang a neih turah theihtawp chhuah a hlawhtling tura an beih a tul thu a sawi a. Sawrkarin dan felfai tak siamin kan tih tur leh tihloh tur a bithliah vek a, hei hi kan hnathawhna ah chhinchhiah in zawm ila kalsualna lakah kan him mai dawn a ni a ti a, mahni hnathawh ah liungawi taka thawh hian inthlahdah a harsa a, keimahni tan mai bakah midangte tan malsawmna kan thlen a ni tiin, kumthar thuvawn atan “Nang malsawmna ni ang che” tih chu an thinlungah chhinchiah reng turin I&PR Directorate a thawkte a chah a ni.