Vawiin khan Aizawl Dy. Commissioner Pu Vanlangaihsaka, I.A.S. hovin DC’s Conference Hall-ah Krismas leh Kumthar hun chhunga Aizawl District huamchhungah dan leh thupek kenkawh a nih dan ennawnin meeting pawimawh tak neih a ni a. Krismas leh Kumthar Hunpui chhunga boruak muanawm tak awm theih nana Police leh Magistrate duty atangin report ngaihthlak a ni.

Aizawl Dy. Commissioner Pu Vanlalngaihsaka chuan mipuiten Krismas-Kumthar hlim leh thlamuang taka an hman theih nan Police leh Magistrate duty siam a ni a; chhungkua, khawtlang leh kohhrana an chanvo leh mawhphurhnate kalsanin rinawm tak leh ngawrh takin an duty thu a sawi a. Sorkarin halpuah hal a khap tlat avangin dan leh thupek kengkawhtute chuan mipui lamin sorkar thupek hi an zawm ngei theihna turin theihtawp an chhuah a; Aizawl hmun thenkhatah halpuah hal chu awm mahse kumdangte aiin boruak a ziaawm chho hret hret zel a, khap loh ai chuan khap hian mipuite lam pawh an fimkhur phah nia hriat a ni. Pu Vanlalngaihsaka chuan police-te report danin rukruk, zurui leh buaina siam rin ai takin an awm lo chu a lawmawm hle a ni a ti bawk.

Aizawl D.C. chuan Krismas leh Kumthar hunchhungin mipuite hlim leh him taka Hunpui an hman theih nan theihtawp chhuahtu Police, Magistrate-te leh a tul anga mipuite hnenah hriattirna pawimawh puangzar thin I&PR Department leh Media zawng zawngte chungah lawmthu a sawi a. Mipuite leh tlawmngai pawl leh kohhrante pawhin sorkar hmalakna tha taka an thlawp thin avangin lawmthu a sawi bawk a ni.