August ni 24 khan District Agriculture Officer, Aizawl District bultumin Agriculture Department hotu te, Aizawl District Bawrhsap leh NLUP Chief Media Officer te chuan Pi Kaphliri, Bungkawn Leilet, Dihmunzawl ami chu a huhovin an tlawh.

Pi Kaphliri te chhung hian an leilet hi ei leh bar a innghah nan ber an hmang a. Agriculture Department-a thawktu ten ti tura an tih ang zela buh leh thlaite chingzel thin an ni. An thawhrimna avanga Buh leh thlai an thar that avangin chawimawina chi hrang hrang pawh an lo dawng tawh a. Chung zinga a langsar deuhte chu :

Dept. of Agriculture & Cooperation, Govt. of India atangin kum 2010 khan Harvest of Hope chawimawina an dawng a; Department of Agriculture, Govt. of Mizoram atangin kum 2011 khan SRI hmanga buh thar tam chawimawina pek an ni a; Department of Agriculture, Govt. of Mizoram atangin kum 2013 khan Agriculture Technology hmang tha leh kuthnathawktu entawntlak chawimawina an dawng a; ATMA Aizawl District atangin 2013 khan Aizawl District Best Farmer Award an dawng bawk.

Pi Kaphliri te chhung hian Agriculture Department-a thawktute zirtir ang leh a that bikzia an hriat tawh avangin buh hi tlar fel tak neiin an phun zel tawh a. System of Rice intensification (SRI) hmanga buh chin pawh a hlawk bik zia hriain an tih chhunzawm zel a. Kuminah pawh hian NFSM scheme hnuai atangin SRI hmangin buhchin tir an ni leh a, NSFM-Coarse Cereals scheme atangin Mizo Mimban leh Sweet corn te an ching bawk.

Agriculture Department-in Buh chi tha an lakchhuah CAU-Rl chu an leilet ah hian chin puntir an ni a. Chu chu a chi atan kum 2013 leh 2015 te khan Agriculture Department-in a 1eisak nghe nghe a ni.

Pi Kaphliri te chhung hi NLUP 4th Phase ah WRC II dawng tura thlan a ni a. Tanpuina an dawn te hi tangkai takin an hmang thin a ni. An thawhchhuah atangin an hnathawhna tura an mamawh Tractor, Huansamna khawl (Brush Cutter) leh Hlokahna lian chi (Power Sprayer)te pawh Agriculture Department atangin subsidy in an lei tawh a ni. An leilet kamah hian Oil Palm engemawzat an phun tawh bawk a ni.

Aizawl District Bawrhsap Pu Kannan Gopinathan te, Agriculture Director Dr.C. Lalzarliana te, NLUP Chief Media Officer Pu David L. Thangliana leh hotu dang an leilet tlawhtute chuan Pi Kaphliri te chhungkaw thawhrimna leh hmalak dan chu fakawm leh entawntlak an tih thu an sawi a, hlawhtlinna an chan zel theih nan duhsakna an hlan a ni.