Kum 1957 atanga India sawrkar laipuiin Indian Council for Child Welfare (ICCW) kal tlanga a lo tih tawh thin angin kuminah pawh Naupang kum 6 leh kum 18 inkar, naupang dangte entawn tlaka mahni nunna emaw hliam tawrh emaw pawh hnial lova misual leh vantlang tana hnawksak (social evil/crime) beitute hnenah National Award a sem leh dawn a. A dawng thei tur rawtna hun September ni 30, 2016 thleng hawn a ni.
He lawmman diltute thil tih chu July ni 1, 2015 leh June ni 30, 2016 inkara thil thleng a ni tur a ni a, dilnaah thil thlen dan tlangpui, thumal 250 vela ziakte, pian ni, thla leh kum finfiahna lehkhate, Newspaper/Magazine a thil thlen dan report copy te, FIR emaw Police Diary copy te thiltel tur a ni. A thiltihte chu a dik ngei a ni tih hriatpuina heng a hnuaia thuneitute zinga atanga pahnih talin an ziah sak bawk tur a ni.
1. Naupang in school a kalna Principal/Headmaster emaw an khawtlang hruaitute (VC)
2. State Council for Child Welfare President emaw General Secretary.
3. Deputy Commissioner emaw a tlukpui sawrkara hotu.
4. SP emaw SP chin chunglam Police Officer te.
He lawmman hi Medal, Certificate leh Pawisa fai tea pek a ni thin a, ram pum huap tlawmgaipawl liante hnen atangin duhsakna thilpek an dawng thin bawk. A dawngtu chu School a kal chhung zawng zirna man tanpuina pek a ni a, Professional Course zir chhunzawmte hnenah ICCW Scholarship Scheme pek thin a ni bawk.
Aizawl District chhunga cheng, he lawmman dil duh emaw, dawng tlak nia hriat rawt duhte emaw chuan District thuneitute hnenah emaw I&PR Directorate- ah emaw office hun chhungin dilna Form ngaihven leh zawhchian theih a ni a, District danga mite chuan an awmna District thuneitute hnenah emaw State Council for Child Welfare hnenah te dilna form ngaihven theih a ni ang.
