Sorkar Laipuia Ministry of Youth Affairs & Sports hnuaia Nehru Yuva Kendra Sangathan Mizoram chu vawiin khan an Chairman Sports Minister Pu Zodintluanga hovin ama office chamber-ah kumin chhunga thalaite tana NYK programme hrang hrang kalpui dan tur an sawiho.

Meeting kaihruaitu Sports Minister Pu Zodintluanga chuan Committee member kalkhawmte lo lawmin sorkar laipui chuan NYK kaltlangin thalaite hmasawnna tur programme zau takin a duang a, a tak taka tih chuan heng programme-te hi thalaite tan a nuamin a phurawm a ni, a ti a. Mizoramah thalai pawl YMA, YLA bakah Sports Club angte an lo awm sa avangin NYK chuan a hranpain Youth Club din lovin heng pawlte nen a thawkho zel a ni tih a tarlang bawk. Minister chuan NYK State Director Pu SR Bishnoi chu hna hautak leh hahthlak tak ni tur state pum NYK office a mal enkawl thei chu fakawm a tih thu a sawi bawk.

State Advisory Committee Member Pu NK Chakma, MLA chuan hnam hrang hrang inkara inunauna leh pumkhatna (communal harmony) hawi zawnga thalaite tan inkhawmpui buatsaih a rawt a, a bial chhungah NEC bultumin Cultural Festival, Youth Camp leh Blood Donation an buatsaih tawh thin chuan thalaite a tiphur hle thin a ni, a ti. Vawiin meetingah hian MLA Member dang Pi Vanlalawmpuii Chawngthu pawh a lo tel a ni.

NYK State Coordinator (Mizoram) Pu SR Bishnoi chuan Mizoram-a an hmalakna leh hmachhawp hrang hrangte a sawifiah a, State Advisory Board Member-a tel state sorkar department-te nena thawkho a, NYK programme hrang hrang kalpui an duh thu a sawi bawk.

Nehru Yuva Kendra hi state 28 leh district 63-ah office an nei a, Block level-ah Youth Development centre 3311 neiin Youth Club nuai 3 a hnuaiah an awm mek a. Mizoram-ah chuan district 8-ah office an nei vek a, thawktu erawh an indaihlo hle a; tun hnai khan Lunglei District NYK Office Coordinator atan Pu Zomuana leh Lawngtlai District NYK Office Coordinator atan Pi Mercy Sellate dah thar an ni.