Vawiin chawhma khan Aizawl District Bawrhsap Dr.A.Muthamma chuan Synod Hospital, Durtlangah NHIDCL in CSR kaltlanga Free Eyecamp a buatsaih leh ICTC te a tlawh.

Aizawl Bawrhsap Dr.A. Muthamma chuan National Highways and Infrastructure Development Corporation(NHIDCL) in Mizoram tan hmasawnna ruhrel liantham tak, NH54 zauh hna an thawk mek tih sawiin mipui tan Corporate Social Responsibility (CSR) kaltlanga an luang chhuak chu thil lawmawm tak a ni a ti a. CSR hmanthat chu mipuite nena inlaichinna tha zawk siamtu a ni a ti. Bawrhsap hi NHIDCL General Manager Pu Sanjiv Jain leh a thawhpui ten an tawiawm a. NHIDCL leh Synod Hospital tangkawp buatsaih, Eye Camp-ah hian BPL chhungkaw member ten a thlawnin an mit an entir a. Vawiina a thlawna mit inentirnaah hian NHIDCL chuan  a mamawh leh Doctorin a chawh te tan tarmit leh damdawi leina senso  a tumsak a ni.

Eye Camp a tlawh zawhah Bawrhsap chuan Synod Hospital a Integrated Counselling and Testing Centre(ICTC) a tlawh leh a. Synod Hospital Director Dr LH Thanga Singson nen inkawm zuiin Aids/HIV kaihhnawih thila hmalaknaah sawrkar leh Synod Hospital te nasa zawka tan an lak tlan theih dan tur te an sawi dun a ni.