Vawiin tlai dar 4 khan Union Minister of Home Affairs Pu Rajnath Singh chuan Mizoram Chief Minister Pu Lal Thanhawla leh Tripura Chief Minister Biplab Kumar Deb te chu a New Delhi Office-ah hmu in, Tripura a Bru chengte Mizorama laklet chungchang a hmalak dan tur a sawipui.

Union Home Minister chuan Mizoram Chief Minister leh Tripura Chief Minister-te hi a hranpa a kawmna a neih hmasak hnuin Ministry of Home Affairs leh state pahnih atanga official kalte leh Mizoram Bru Displaced People's Forum hotute nen Reang Bru lak let chungchang hi sawiho leh a ni a. Bru Repatriation chungchanga Draft Agreement chu uluk taka ngaihtuah ho niin, Mizoram Sawrkar ngaihdan te thlen a ni bawk a. Siam that ngaite siam that a nih hnu in Draft Agreement hi sign a ni ta a. Hemi hnuaiah hian kumin September ni 30 ral hma ngeia Bru Mizorama lo la kirlo te chu la let tura ruahman a ni.

Agreement ziahnaah hian Union Home Minister leh State pahnih Chief Minister te chu witness /hriatpuitu ah tangin, Mizoram Sawrkar aiawhin Principal Secretary, Home Pu Lalnunmawia Chuaungo leh Tripura Sawrkar aiawhin Chief Secretary Pu Sanjeev Ranjan ten an sign a, Ministry of Home Affairs aiawhin Special Secretary, Internal Security Pi Rina Mitra leh Mizoram Bru Displaced People's Forum aiawhin an President Pu A. Sawibunga chuan hming an ziak bawk.

Bru laklet chungchang bakah hian Mizoram Chief Minister chuan Zokhawthar Tiau Lei a Assam Rifles in sumdawnna bungrua phur Truck a dang chu ngaihven a, a rang thei ang bera heng lirtheite hi Assam Rifles in an chhuah theih nan Union Home Minister hnenah hian a thlen a. Zokhawsang a Assam Rifles sawn chungchang pawh uluk takin Union Home Minister hi a sawipui a ni.

Vawiin meeting-ah hian Ministry of Home Affairs atangin Home Secretary, Special Secretary, Adviser (N.E), Joint Secretary (N.E) leh Director, Intelligence Bureau an tel a. Mizoram Chief Minister hi Principal Secretary, Home leh OSD Home Pu David H. Lalthangliana ten tawiawm in, Tripura Chief Minister chu Chief Secretary in a tawiawm a ni.