Vawiin khan Commerce & Industries Minister Pu H Rohluna'n Zemabawkah Mizoram KVI Board Multi-Disciplinary Training Centre (MDTC) building sak thar a hawng.
Pu H.Rohluna chuan tunlai thalai lehkhathiamten mahni ke a dinga, eizawnna bul an tan theih nan NEDP kaltlangin sawrkarin hma a la mek, a ti a. Entreprenuership lamah thalai tam zawk an luh theih nan sawrkarin kawng a hawng a, mi hnuaia hna thawh tur zawngtu ni lova midangte eizawnna siam saktu an nih theih nan sawrkarin a finchhuah a, sum lamah tanpuina a pe bawk a, hei hi mipuiten an chhawr tangkai thiam a ngai a ni, a ti. Industries Minister chuan eizawnna tlinga hman theih tur thiamna mipuite zirtirin sawrkarin hma a la a, MDTC pawhin chhawr nghal mai theih tur trade chi hrang hrang Mizo thalaite a zirtir mek lai hian zirlaite taima turin a fuih a. An kutchhuak chu mi duh zawng, mi mit tlung, belhchian dawl a ni tur a ni tiin kawng engkimah inelna a nasat tawh avangin an kutchhuak apiang chu uluk taka tuai hnum a, mi ten dawr nawn leh pan nawn an chak theihna turin rinawm taka thawk turin a fuih a. Mizoram state leh India ram pawhin a mamawh skill development chu sawrkarin mumal taka kal chhoh pui chhunzawm zel a tum thu leh skill development training chhuak ten ram chhung mai ni lo ram dang thlenga an chhawr theih tur certificate pek chhuah dan kawng dap a nih thu Labour Employment, Skill Development and Entrepreneurship changtu Minister Pu H.Rohluna chuan a sawi bawk.
Mizoram KVI Board Chairman Pu K Lianzuala pawhin thu sawiin MDTC atang hian mi tam takin inchhuhsak theihloh rohlu- thiamna an chharchhuak tawh a; miin thiamna an neih a, chhungkaw chawmna tur eizawnna tha an neih theih nan thiamna chi hrang hrang chi sawmpali zet he hmunah hian mi engemawzat zirtir reng an ni, a ti a. Training chhuak ten mahni intodelh a, eizawnna ngel nghet an neih chu a tum ber a nih avangin sawrkar hmalakna NLUP leh NEDP nen pawh a inthlawp tha hle a ni, a ti. Kum 2009 atangin KVI Board in kawng hrang hrangin hmasawnna leh hlawhtlinna an hmu nasa a, India ram State te ber te zinga mi ni mahse Mizoram chu Khadi & Village Industry ah a titha ber pawl niin lawmman te hial a dawng thin chu thawktute inpumkhatna leh taimakna rah a ni, a ti a. MDTC building thar pali zet hawn a ni chu KVI tana mel lung pawimawh leh hun chhinchhiah tlak a nih thu KVI Board Chairman Pu K.Lianzuala hian a sawi bawk.
Mizoram KVI Board hnuaiah MDTC hi kum 1987 April thla khan din a ni a. He centre-ah hian puanthui, beauty culture, thing mistiri, cane and bamboo, khadi cotton weaving, sahbawn siam, masala siam, fibre processing, tung oil, village oil industry, eitur sawngbawl, khuai khawi, steel fabrication leh thir chher hna te a training theih a. Kum 1992 atanga vawiin thleng hian mi 5000 an train chhuak tawh a ni. He training centre ah hian ministerial staff 15, technical staff 33, contract a thawk 5 awmin an vaiin thawktu 53 an awm mek a ni.
MDTC building thar hi NEDP sum cheng nuai 228 hmanga sak a ni a. Building hlui thiah hna hi kum kalta September 11 atanga 19 chhung thawh a ni a, September ni 20 ah a sak hna thawh tan niin thla sawm chhung thawh a nih hnuah kumin June 26 khan tha taka zawh fel a ni. Hawnna inkhawm hi Mizoram KVI Board CEO Pu Kaisangzuala’n a kaihruai a. Er. Rodinsanga, Asst. Project Engineer, Mizoram KVI Board chuan technical report a pe a ni.
