Aizawl Bawrhsap Pisapui, tuna DC Office tia hriat lar tak kum 125 tlin lawmna chu nimin khan DC Bungalow, Tuikhuahtlangah neih niin hemi pual hian DC Office ah lungphun a ni. Lawmna inkhawm, DC Bangalow a buatsaih ah hian Aizawl DC Dr Franklin Laltinkhuma chuan kalkhawmte lawmin Aizawl DC office chu inrelbawlna lam hna thawktu chauh ni lovin, a taka mipui rawngbawltu a ni, a ti a. Hna thawh tur tuk bik piahlama thawh tur tam tak awm belh chang pawh a tlawmngaih chhuaha, taima taka thawk thin DC Office-a officer leh staff zawng zawngte chu fakin taima lehzuala mipui rawngbawl turin a sawm a ni.

British sorkar-in Mizoram a awp lai, 22.4.1890 khan North Lushai Hills Political Officer atana ruat Captain H.R.Browne chuan Aizawl Bawrhsap hmasa ber ni turin he hna hi a zawm a. Hetih hunlai hian Bawrhsap hi Political Officer tih a ni. Bawrhsap hian sipai commandant hna nena kawpin Pisa hna pawh sipai hmunah thawh a ni thin. Deputy Commissioner tih a nih hnua DC hmasa ber chu SN Barkataki a ni a, Mizo zingah Aizawl DC hmasa ber chu Pu P.Rohmingthanga a ni.

Kum 1870 a hawn Tlabunga Dak In (Post Office) tih lohah chuan Aizawl Bawrhsap Pisa hi Mizorama office awm hmasa ber niin Mizoram Sorkar pisa pangngai, Administrative Department awm hmasa ber a ni. Hetih hunlai hian sorkar rorelna zawng zawng hi Bawrhsap kutah a awm vek thin a. Hun lokal zelah sorkar department hrang hrangte lo ding tawh mahse Aizawl DC hna hi a pawimawhin a la tangkai hle a ni. Tun dinhmuna Aizawl DC hna pawimawh langsar zualte chu - Mizoram pum atana Rajya Sabha leh Lok Sabha MP Fund hmuh zawng zawng hi Aizawl DC Office ah thleng khawmin District hrang hrangah sem darh leh thin a ni; sorkar ram lak tur reng reng hi DC kaihhruaina hnuaiah tih vek a ni a; khuarel chhiatna, leimin, thlipui, tui lian leh harsatna dang lo thlen reng rengin DC office hian a tul angin hma a la nghal thin; inthlan chungchangah MLA, MP, AMC leh Local Council bakah kumin atang phei chuan VC inthlan thlengin Aizawl DC kuta dah a ni; NLUP sum sem hna hi a kaihhnawih Department hrang hrangte’n thawk mahse DC tel lo chuan pawisa hi pek chhuah theih a ni lo; Certificate hrang hrang Tribal, Residential, Income te bakah silai license leh Inner Line Permit thlengin DC office atang hian pek chhuah a ni. Tun dinhmunah Aizawl DC hi District Level Committee hrang hrang sawmriat chuangah Chairman a ni bawk.

Bawrhsap pisapui kum 125-na lawmna inkhawmah hian Aizawl Bawrhsap hlui Pu P.Rohmingthanga, Pu C.Tawnluaia, Pu Vanengmawia leh Pu C Thanchhumate an tel a. DC office a lo thawk tawh thin officer leh staff engemawzat lo tel zingah Indian Society on Tobacco and Health, Mizoram Chapter a President Pi Lal Riliani pawh he hunah hian a tel a. A ni hi Aizawl DC Staff Welfare Organisation a Chairman hmasa ber leh ni rei ber a ni.