No.2156/2020-2020

Aizawl District huam chhung ramhnuaiah tunlai hian mi thenkhatin awlsam taka ken mai theih thingzai khawl, ‘Chainsaw’ hmangin thing kih leh zai an ching tih hriat a ni a. Hei hian ramngaw a tih chereu nasat bakah ramsa leh savaten thing, a rah tlan tur an neih tak loh avangin an bo duak duak a. Chuvangin, ramngaw te a lo chereu zel loh nan leh ramsa leh savaten min tinsan mai loh nan he khapna thupek hi Section 144 CrPC (Act No. 2 of 1974) in thuneihna a pek angin Aizawl Bawrhsap chuan ahnuaia thupek hi a chhuah a ni.

“Aizawl District huam chhung ramhnuaiah Bialtu DFO in ziaka phalna a pe a nih loh chuan mi tumahin thingzai khawl, ‘Chainsaw’ hmangin thing an zai in an kit tur a ni lo. He thupek zawmlote chu Dan anga hrem an ni ang. He thupek hi hnuh kir a nih loh chuan tihchhuah a nih (18.6.2020) atanga thla hnih (2) chhung a huam ang.