Finance Minister Pu Lalsawta chuan vawiin chawhma khan Aizawl Book Fair vawi 10-na chu Vanapa Hall-ah a hawng.
Minister chuan khawvel huap lehkhabu tha tak takte Aizawl Book Fair hmanga Mizoram mipui ten an chhiar theih tura tura chhawp hnaih a ni chu lawmawm a tih thu a sawi a. Mihring rilru leh ngaihtuahna tihmasawn kawnga lehkhabu chhiar tam leh hriatna tihzau pawimawhzia a tarlang a; tunlai khawvel hmasawnna thang chak tak karah mi nawlpuiin lehkhabu chhiar taimakna an tlakchham hret hret thu sawiin, lehkhabu hi khawvel hmasawnna tuartu (casualty) a nih mai loh nan lehkhabu ngainat leh hlutna chang kan hriat thar leh theuh a pawimawh hle a ni, a ti a. Minister Pu Lalsawta chuan Book Fair chu mipui te leh zirlai ten tangkai taka an hman a beisei thu a sawi bawk.
Aizawl Book Fair vawi 10-na hi May ni 4-17, 2017 chhung hian Vanapa Hall-ah neih a ni dawn a. Naupang, zirlai, thalai leh upa lam te chena chhiar tur lehkhabu tangkai tak tak chhawp chhuah niin, a man pangngai aia zaa sawm (10%)-a tlawmin lei theih a ni. Aizawl Book Fair hi kum 2003 atang khan Pi Maggie L.Ralte leh Bookline tawngkawpin an lo buatsaih tawh thin a ni.
