Vawiin khan Reformation and Camping Centre, Lawipu panna kawng NEDP hnuaia siamthat mek chu Pu Lalrikhuma , Adviser Planning and Programme Implementation Department chuan a hmunah tlawhin a enfiah. 

Pu Lalrikhuma chuan NEDP hnuaia hnathawh hi chu a chhe thianglo tiin tuna hna thawh chin chu tha thawkhat a tih thu a sawi a. NEDP hnathawh viltu tur Monitoring Committee-in hun bituk neia Review Meeting a neih bakah a tam thei ang ber a hmun ngeia kala hnathawh endik zel an tum thu sawiin hnathawktu te chu tha taka thawk turin a chah a. Planning Adviser chuan helai kawng hmang tangkai tu; Quarry neitute leh lungphur thin te pawh dim tak leh tha taka kawng enkawl tura a duh thu a sawi bawk a ni. 

Lawipu-a Reformation and Camping Centre panna kawng hi km 1.92 siamthat  tum niin  hna hi PWD in an thawk mek a. Hemi atan hian cheng nuai 48.46 ruahman a ni a, tun thla chhunga thawh zawh hman tum a ni. 

Planning Adviser hi Pu Laldinthara Ralte Research Officer Planning & Program Implementation Department leh Pu P.C Zokhuma SDO, Aizawl Sub-Division II te in an tawiawm a ni.