Aizawl khawpui chhunga nitina tlan thin City Bus khalhtu leh conductor-te chuan tun thla January 15 atang hian thawmhnaw hak tur bik (uniform) hmangin hna an thawk tawh dawn a. Driver leh conductor-te uniform tlangzarhna hun hi vawiin chhun khan Ngaizela ACBOA office-ah buatsaih niin Transport Minister Pu John Rotluangliana’n a hmanpui a ni.

Transport Minister chuan ACBOA in an driver leh conductor-te tana uniform mawihnai tak an buatsaih chu lawmawm a tih thu sawiin khawpui chhung cheimawitu tangkai tak leh city bus enkawltute tana inthununna hmanraw tha tak a nih a beisei a ni. Deputy Speaker a nih laia khawvel hmun hrang hrang a zinkualnaah mipui mimir veivahna lama hruaitu lirthei khalhtute thawmhnaw inbel thianghlim dante, an hawihhawm leh hun an vawn dik dan a hmuhte sawi langin thawmhnaw inbel tur bik hian mihringte thinlungah inthununna tha tak a siam thin a ni, a ti a. City Bus enkawltu driver leh conductor-te pawh an passenger-te laka hawihhawm leh that chhuah zui zel turin a chah nghal a ni.

Vawiin inkhawmah hian Transport Secretary Pu Lalhmachhuana, Transport Director Pi Lalzarmawii leh Traffic SP Pu Lallianmawia te an tel.

Uniform hi tun thla ni 15 atangin Thawhtanni, Nilaini leh Zirtawpni-ah te hak tur a ni a. Driver form rawng hi a pawl, Conductor a paw dal niin MR form hi a sen a ni.