2510/2025-2026

Dated Aizawl, the 3rd December, 2025: Vawiin khan Aizawl veng hrang hrang Local Council aiawhte leh P&E Department hotute'n, Engineer-in-Chief, P&E Department Conference Hall, Kawlphetha Building Rooftop-ah Joint Meeting an nei a. Er. Lalrinmawia, SE Aizawl Power Circle chuan meeting hi kaihruaiin power supply lamah tun aia hmasawnna neih dan turte leh thawh hona tha zawk neih dan turte sawi ho a ni.

Pu C. Lalbiaknunga, President, Aizawl City Local Council Association chuan thu sawiin Local Council leh P&E Department-te'n Aizawl khawpuia power supply tha lehzual a awm theihna tur leh khawpui tih hmasawnna tura inhmuhkhawmna hun tha an nei thei chu lawmawm a tih thu a sawi a. Mipuite mamawh kawlphetha pek chhuah kawngah P&E thawhpui turin Local Council tinte chu an inrin reng thu a sawi bawk a ni.

Er. Lalngaihsaka, EE, Distribution Division chuan Agenda-te sawi zauna a neih zawhah thurel tan nghal niin, power chungchanga thil pawimawh, mipuite hnena hriattir zung zung dan tur te, mipuite hnena power supply tha zawka pek a nih theih nana Line leh Transformer-te dahna hmun tur ruahman chungchang te, electric bana a hrui inthlung hnawk lutuk tih fai leh a hnawk lehzel tur ven kawnga hmalak hona turte rel a ni a. Mipui him zawk nana electric ban leh line hnai lutuka in sak leh electric hrui fual lutuk awm loh nana hmalak te, power supply bo thlau - power pawh ruk, spark nasa, chhun lama street light eng leh tul lova power ti hek thei thil dangte ven kawnga hmalak ho dan turte sawi ho niin, Krismas leh kumthar hunpui lo thleng tur atana inbuatsaihna chungchangte sawi ho a ni bawk.

Vawiin meeting-ah hian Aizawl veng tin Local Council atangin Member pahnih (Chairman/(Electric in-charge)/Secreatary)te leh P&E Department atangin Aizawl khawpui chhung enkawltute EE (Distribution Division), EE (Revenue Division), EE (Generation Division) te bakah SDO leh JE-te an tel a ni.