2509/2025-2026

Saitual, the 3rd December, 2025: Vawiin khan Samagra Shiksha, Saitual District buatsaihin Gospel Centenary Hall, Saitualah Saitual District Elementary Quiz Competition 2025-26 neih a ni a, a hawnna inkhawmah hian Pi F. Zodingpuiii, DIPRO chu khuallian niin hun a hmanpui.

Khuallian Pi F. Zodingpuii chuan Elementary school naupangte tana Quiz competition buatsaih a ni chu lawmawm a tih thu a sawi a, naupangte pawhin hlawkna an chhar ngei a beisei thu a sawi bawk. Khuallian chuan zirlai naupangte chu nu leh pate leh zirtirtute thu awih turin a chah a, lehkha tha taka an zir chuan an nu leh pate an hming an ti thain an chawimawi dawn a ni, a ti.

DIPRO chuan Quiz competition-a tel tangkaina te a tarlang a, tunlai khawvelah hna zawnna kawngah te General Knowledge (GK) hriat zau a pawimawh avangin naupangte chu thil chik leh chhinchhiah peih tur te, heti ang competition-a tel tam turin a fuih a. Mi hlawhtling an lo nih theih nan zuk leh hmuam bakah ruihtheihthil laka fihlim turin a chah nghal bawk a ni. Khuallian chuan zirtirtute chu naupang than lenna kawngah mawhphurhna sang tak an nei tih a sawi a, zirlai zirtir maia duh tawk lo a, nungchang tha zirtir a, thu tha te hmanga naupang kai hruai thin turin a chah nghal a ni.

Vawiin Saitual District Elementary Quiz Competition 2025-26 hawnna inkhawm hi Pi Chhuanhlupuii, Addl. DPC & SDEO chuan a kai hruai a, khuallian Pi F. Zodingpuiii, DIPRO chuan thu sawiin, report hi Pu C. Vanlalhriatpuia, PA, DPO hnen atangin ngaihthlak a ni. Quiz Competition-ah hian Saitual District chhunga primary school atangin team 9 leh middle school atangin team 7 te an tel a, a vaiin team 16 an tel a ni.

Result chu hetiang hi a ni:

Middle section:
1st- Presbyterian English School, Saitual
2nd- Presbyterian English School, Keifang
3rd- Graceland Adventist School, Keifang

Primary Section:
1st- Oxford English School
2nd- Primary School-II, Saitual
3rd- Graceland Adventist School, Keifang