No.3597/2021-2022

Aizawl, the 8^th January 2022 : Vawiin khan Aizawl DC Dr. Lalhriatzuali Ralte hovin Aizawl SP Office, Conference Room ah nimina SEC in COVID-19 hripui, a bik takin a chi thar Omicron Mizorama a darh loh nana inkaihhruaina vawiin atanga hman tan tur a chhuah chu bawhzuiin Aizawl DC in hma a lakna tur leh ruahmanna a siam tur chungchangah inrawnkhawmna neih a ni. 

Aizawl DC chuan Covid-19, chi thar Omicron laka kan him theih nan Sawrkar duan inkaihhruaina SOP te leh CAB te mitinin kan ngaihpawimawh thar mai bakah hengte hi khauh taka kan kalpui theuh a tul a. Mipui tana harsatna thlen thei zawnga ruahmanna siam hi kan duh ber a ni lova mahse kan him tlan nan siam a ngai fo thin tiin mipuite te hriatthiamna ngenin engtik lai pawhin mask hrenga, sanitiser hmanga, midang nena inchiahpiah zawnga a tlem thei ang bera khawsa turin a ngen a ni.

Meeting ah hian zau takin AMC area chhunga inkaihhruaina kalpui tur thenkhat a bik takin Sakhaw Biak In leh inkhawm, bungraw load leh unload, mimal tui chawi, restaurant leh bazaar leh dawr hawn dan chungchanga inkaihhruaina kalpui dan tur duan leh ruahmana ah MKHC, MIMA leh MBCC hruaitute chuan an ngaihdan leh ruahmanna tha nia an ngaihte an sawichhuak a. Sumdawng pawl hruaitute te chuan inkharkhipna rei tak lo kalpui tawhin sumdawngte a nghawng nasat avangin mipuite te himna dah pawimawh chunga, dawr leh bazaar hawn dan tur, inhawnchhawk tlem thei ang bera ruahman turin an ngen a ni. Meeting ah hian khawhar in lenpui chu fimkhur taka kalpui a tul thu sawilan a nih bakah inkhawm chungchanga CAB khauh taka kalpui a nih theih nan LLTF te sawma CAB/SOP Implementation Committee din chu Kohhran tinin ngaipawimawhin din ni se tia ngen a ni.

Vawiin meeting dunzuiin Aizawl DC hian Dawr leh Bazar hawn dan tur ruahmanna chu a chhuah beisei a ni a, hei bakah hian ruahmanna tul dang pawh a chhuah beisei a ni bawk.

Meeting ah hian Senior SP Traffic, Aizawl; Aizawl DC Office a thawk officer te, CMO (East leh West te) MKHC, MIMA, MBCC, All NGO Coordination Committee leh Aizawl City Local Councils’ Association hruaitute an tel a ni.