No.3596/2021-2022

Aizawl, 8^th January, 2022 : Health Minister Dr R. Lalthangliana chuan vawiin khan Lengpui Airport-a COVID-19 Screening Point a tlawh a, Omicron variant lo thleng thei kara thlawhtheihna hmanga khualzin lo thleng hlimte dawnsawn dan tur leh buaipui dan tura ruahmanna a endik. Health Department Secretary Pu R. Lalramnghaka, Health Department Principal Director Dr F. Lallianhlira, DM&R Addl Secretary Pu Vanlalmawia bakah Home Department aiawh, Civil Aviation Wing (GAD) aiawh, Aizawl DC aiawh leh DIPR aiawhte pawh he hunah hian an tel a, Lengpui Village Council hotute leh VLTF aiawhte an tel bawk a ni.

Health Minister Dr R. Lalthangliana chuan khawvel leh India ram hmun tinah COVID-19 hrik (variant) thar “Omicron” a leng mek a, khawvel ram hrang hrangah leh India ram State hrang hrangah inkhuahkhirhna leh inkaihhruaina thar an hmang leh tawh a, Mizoramah pawh mithiamte rawn chungin sawrkarin Mizoram pawn atanga lo lutte lo endik dan tur leh dawnsawn dan tur ruahmanna a siam thar leh a, awmze nei leh mumal taka kan inpuahchah hi thil pawimawh tak a ni, a ti a. Lengpui Airport hi kan luhka pawimawh, a bik takin India ram pawn atanga lo haw te leh thenawm hnaivai State tih loh India ram hmun dang atanga khualzinte an lo luhna hmun  a nih avangin uluk taka kan vil a tul a ni, a ti a. Lengpui Airport chei that hna kal lai mel tithuanawp si lova hmalak a ngaih vangin a hmun ngeiah department hrang hrang aiawhte nen kan enho thei hi a lawmawm takzet a ni, a ti.

Thlawhtheihna nikhata Lengpui Airport-a rawn tum a tam leh tak avangin khualzin lo thlengte sample test awlsam leh hun heh lo zawka kalpui a nih theih dan turte enin ruahmanna siam a ni a, Lengpui Airport ground floor-ah Thlawhtheihna lo thleng hmasa a chuangte sample test a nih chhunga midang, thlawhtheihna danga lo thlengten harsatna nei lova an lo thut hahdamna turte, kum upa/tar chak lo leh damlo wheel chair-a nawr ngaite sample test na tur bik “special booth” leh positive an awm palha dah hranna tur isolation tent ruahman a ni a. First Floor-a passenger nawlpui sample testna booth hrang hrangte endik niin positive te dah hranna tura ruahman sa pawh mumal leh felfai zawka ruahman dan turte siam a ni. Thawktu mihring indaihlohna phuhruk dan tur pawh sawiho niin ruahmanna siam a ni a, khualzin lo thleng zinga hri kai hmuhchhuahte phurh chhuah dan tur leh an inenkawl chhunzawm dan turte pawh sawiho niin a buaipuitu tur bik thuneituten rang takin hma an la nghal dawn a ni.

Paramilitary Forces zinga hri kai hmuhchhuahte an hotuten an ngaihsak tawk loh thu leh zan thleng thlenga hruai loh a an awm thin chuan Airport Security thleng a nghawng theih thu Airport viltu ten an sawi chhuak a, Home Department in a tul angin hma an la nghal dawn a ni.