No.803/2021-2022

Aizawl, the 3rd June 2021 : Vawiin khan I & PR Auditorium-ah Aizawl DC Dr. Lalhriatzuali Ralte kaihhruaina hnuaiah Aizawl khawpui chhunga COVID-19 hripui dona leh khuahkhirh kawnga Containment Area/Zone puan dan chungchang thlirletna ‘review meeting’ neih a ni. Meeting ah hian Aizawl SP aiawh; State Nodal Officer, ISDP; State Containment & Surveillance Management Unit aiawh, CMO Aizawl East leh West aiawhte, IMA aiawh, Aizawl khawpui chhunga Incident Commander te leh COVID damlo enkawlnaa mawhphurtute an tel a ni.

Meeting ah hian Containment Area/Zone puan dan thlirlet niin duhkhawp lohna laite Incident Commander ten an sawi lang a. Containment Area/Zone puan hmaa hri darh dan dinhmun chhui chianna assessment an tih dan te, active case search an tih dan te leh positive contact test an kalpui dante CMO Aizawl East leh West aiawh ten chipchiar takin an sawi a. Containment Area/Zone puan hmanhmawh a tulzia leh tihkhawtlai chi a nih lohzia tilang turin tunhnaia Aizawl hri darh zualna veng thenkhat leh Containment Zone thenkhat chanchin leh dinhmun te tarlan a ni a. Hengah te hian LLTF te pawimawh dan leh Containment Area/Zone puan vat a tul chhan an hriatchian a tul zia te pawh sawilan a ni a. Containment Area/Zone puan tulna assessment a awm tawh chuan a puanna lamah tihkhawtlaina engmah siam lo turin LLTF te ngen zel tha an tih thu pawh meeting ah hian sawilan a ni. Rawtna engemawzat siam niin hengte hi a taka kalpui turin hma lak a nih tur thu DC chuan a sawi a ni.

Containment Zone a hman tur SOP te chu khauh taka hman leh kalpui a tul zia te, heng hmuna lut leh chhuakte uluk leh zawka enchian leh essential service thila duty te pawh contact tracing ah an fihlim em tih te thlenga en a tul thu sawilan a ni bawk a. IMA aiawh atangin CCCC an vil dan chanchin tlangpui leh harsatna an tawh thenkhatte sawi lan a ni a. Incident Commander ten Containment Zone puan dan an duhkhawp lohna laite sawiin rawtna tha nia an ngaihte an sawi tel a. Containment Zone hlih dan ruahmanna hman mek pawh sawiho ni bawk.