Vawiin khan Pu Vanlalngaihsaka, IAS, Aizawl DC kaihhruaina hnuaiah District Level Fire Prevention Committee te chu DC Conference Hall ah an thukhawm a, Aizawl District huam chhunga Fire Prevention Week, 2020 hman dan tur te, kumin thal chhova kangmei laka inven dan tur leh hmalak dan tur hrang hrangte an rel.

Pu Vanlalngaihsaka, District Level Fire Prevention Committee Chairman ni bawk chuan District dang ngaihtuahin Aizawl District ah lo neia eizawng an tlem a, ram kang bakah thal chhova in kang a tam thin hi kan vei a tul reng a, kangmei ti chhuak lo turin mipuite kan inzirtir a ngai reng a, hemi kawnga hian nasa leh zawka awareness kan neih a tul a ni, ti. Committee chuan mipuite kangmei ti chhuak lo tura kawng engkimah fimkhur turin a chah a ni.

Member Secretary Pu Kawlhnuna, DFO Aizawl in kum danga hma lak tawh dante, kumin hmalak dan tura State Level Sub-Committee in ruahmanna a lo siam tawh dan te leh thil tul dangte chipchiar taka sawifiahna a neih hnuah member te hian Aizawl District-a hmalak dan tur hi an rel zui a ni. Aizawl District a Fire Prevention Awareness programme chu Muthi ah March ni 5 zanah hman nise tiin Committee chuan an rel a. Kawng hrang hranga mipuite zirtir leh in hrilhhriat dan te pawh sawiho a ni bawk.