Vawiin chawhma khan DC Conference Hall-ah Aizawl DC Dr. A Muthamma kaihruaina hnuaiah Project HIMNA-MADAT (Mizoram Against Drugs, Alcohol & Tobacco) meeting neih a ni. Baptist Church of Mizoram, Seventh-Day Adventist Church, The Salvation Army, Synod Social Front leh DIOCESE Catholic Kohhran, Health Department, SSA,  Institute of Advanced Study in Education (IASE), School Education Department, MSACS leh MZU Mass Communication Dept aiawhte an tel a ni.

Meeting-ah hian HIMNA-MADAT chak zawka kalpui dan tur ruahmanna leh budget estimate thlir ho a ni a. Ruahmanna hrang hrang awmin chungte chu: Project-in a huam school-ah HIMNA Club din te, mipui hnena zirtirna hmanruaah poster leh sticker hman te, school hrang hrangah inhrilhhriatna atan drawing, essay leh elocution competition buatsaih te, zirtirtute leh zirlai nu leh pa inhmuhkhawmna neih te a ni.

Project in a huam Aizawl District chhunga upper primary school 227-ah HIMNA-MADAT module zirtirtuten naupangte an zirtirtur thlirhona neih a ni a. Module pahnih awmin Level 1 hi class 5 leh class 6 tan a ni a. Chhungkaw pawimawhna te, thian tha neih thatna te, hriselna leh ruihhlo chungchang te module-ah hian a tel a. Level 2 hi class 7 leh class 8 zirlaite tana duan niin zirlaite tana drugs, zu leh vaihlo laka inven dan te, taksaa a thawh dan te, zirlaiten thuthlukna dik tak an siam theih dan te tarlan a ni. Zirtirtute tan training buatsaih tum niin School tinah nodal teacher ruat an ni tawh a. School 227 te hi HIMNA-MADAT member leh Health Department mi leh sa ten an tlawh chhuak dawn a, August thla atanga kalpui tum a ni. Heng bakah hian zirlai naupangte tan hospital leh anti-tobacco clinic te tlawhpui tum an ni a. Project thil tum huam zau zawka mipuiten an hriat theihna turin print media leh social media hman chungchang rel tel a ni.

Project HIMNA-MADAT (Mizoram Against Drugs, Alcohol and Tobacco) hi New Economic Development Policy (NEDP) hnuaia Aizawl DC Pilot Project niin ruihtheih thil laka thalaite an fihlim theihna tura beihpui thlakna a ni a. Project HIMNA-MADAT hnuaiah hian Kohhran hruaitute, NGO hruaitute, sawrkar department leh zirna in hotute nen meeting neih a lo ni tawh thin a. Training of trainers for Church leaders pawh May thla khan ATI-ah buatsaih a lo ni tawh a ni.