Vawiin chawhma dar 11:00Am khan Mizoram Legislative Assembly, Speaker Pu Hiphei in cheng nuai Rs.168.82/- senga sak District Panchyat Resource Centre(DPRC) Meisavaih a mi chu a hawng.

Vawiin DPRC hawnna inkhawm hi DPRC Auditorium-ah neih a ni a. Pi Maria C.T. Zuali, Director, SIRD &PR in inkhawm hi  kaihruaiin, Rev.S.Vabeikhokhei, Meisavaih Bialtu pastor in hunserh a hmang a. Model Youth Association(MYA)  ten opening song an sa .Pu C.Lalthlansanga, Core Faculty (RE), SIRD &PR in Technical report pein, DPRC sak chho dan Slide show a entir bawk. Pu Khuanthansanga Pakhuangte, Sr.Core Faculty (PA), SIRD &PR  pawhin  DPRC  dinchhan leh lo pianchhuah dan te sawina hun a hmang bawk.

Vawiin DPRC hawnna inkhawma khuallian Pu Hiphei chuan thu sawiin,India ram state te(small state) ho zingah Mizoram chu Hmasawn chak ber te zinga 4-na dinhmun a luah mek a.   Grass root level a hmasawnna ruhrel khawihtu leh hrechiang bertu kan VC member ten  chak leh zuala kan State hma a sawn theih nana thiamna leh finna kawnga pur an chawhna tur DPRC kan District a hawn theiha a awm hi ka  lawm tak zet a ni tiin,   Kan Siaha District a kan VC member te pawhin he DPRC hi an mahni pual liau liaua din a ni tih hre reng a, thiamna leh finna kawnga purchawh nan tangkai taka hmang turin leh faculty member  te nen inlungrual taka kan district hmasawn nan theitawp chhuaha thawkho zel turin duhsakna a hlan hlawm a ni.

He DPRC hi State Institute of Rural Development & Panchyat Raj(SIRD&PR) hnuaia  sak niin, a sakna sum hi Ministry of Panchyat Raj( MoPR) atanga dawn a ni thung.

DPRC hi Siaha DC office ramchhunga sak a ni a. 1st Oct,2016 khan sak tan niin, kumin ni 8th Feb,2018 khan sak zawh a ni. A plinth Area hi 400sqm(4305sqft) a ni a, a building pumpui zau zawng hi 685sqm(7373sqft) a ni thung.DPRC hian Head faculty room-1,Establishement room-1, Conference Hall mi 40 len theihna leh Auditorium mi 80 len theihna pakhat ve ve awmin, Sound system tha tak a thuam vek a ni bawk.Heng bakah hian Library-1, Guest room -15 (double bedded with bathroom attach) leh Kitchen leh Dinning room mi 30 leng a awm bawk.

Vawiin DPRC hawnna programme-ah hian Pu S.Hiato Ex-Minister leh president MDCC te, MADC a Hruaitute, Head of office te, Siaha MJA member te, Tlawmngai pawl hrang hrang hruaitute leh  Siaha town VC member tha hnem tak an tel a. Hawnna inkhawm hi Pu Lalphunchhunga, Faculty, DPRC in lawmthu sawina in khar ta a ni.

Vawiin DPRC hawnna inkhawm chhimtu zawng zawng  te nen tlaiah ruai kilho nghal a ni.