Vawiin khan Aizawl DC Office Chamber ah District Municipal Election Officer, Aizawl District  Pu Vanlalngaihsaka kaihhruaina hnuaiah Aizawl Municipal Corporation hnuaia Local Council pathum II/1- Chaltlang, IX/3- Chhinga Veng leh XIII/3-Kanan Veng Local Council By Election 30th August 2019-a neih tur chungchanga hriattur pawimawh te political party aiawh te nen sawiho a ni. He thutkhawmna ah hian Asst District Municipal Election Officer bakah INC, MNF, ZPM, BJP leh NPP aiawh te an tel a ni.

He inhmuhkhawmna ah hian Aizawl District Bawrhsap ni bawk Pu Vanlalngaihsaka chuan Local Council bye election neihna tur veng pathum ah te hian inthlan puan ni, 6th August, 2019 atanga inthlan zawhfel ni tur 2nd September 2019 chhung hian  State Election Commission in a tih chhuah, Model Code of Conduct chu zawm tur a nih thu a sawi. Hemi hun chhung hian sawrkar scheme reng reng a dawngtu tur (beneficiary) thar thlan theih a ni dawn lova, hna la thawh loh,  a thawhna tur sum sanction tawh te pawh inthlan hun chhung hi chuan thawh theih a ni lo a ni. Hei bakah hian MP Local Area Development Scheme leh MLA Local Area Development Scheme hnuaiah hna thar a thawh theih loh a ni. Inthlan hun chhung hian phalna nei lovin Political Party emaw Candidate ten  kawngpui ah banner emaw gate emaw siam phal a ni lova, hetiang siam an awm chuan District thuneitute hnena thlen theih a ni. Vote thlak ni, 30th August 2019 ah hian vote thlak tur phurkhawmna atan eng lirthei mah hman phal a ni lova, candidate te hi motor pakhat hman phalsak an ni a amaherawhchu Returning Officer hnenah phalna an la tur a ni. Inthlan dang ang bawkin vote thlak hma darkar 48 chhungin campaign phal a ni lova, 28th August 2019 4:00PM - 30th August 2019 4:00PM chhung hian eng ang kawng pawha campaign theih a ni tawh lo a ni.

Local Council pathum a By- Election neih chhung hian Political party emaw Candidate ten District Magistrate, Sub Divisional Magistrate emaw Executive Magistrate phalna la hmasa lovin vantlang hmunah engmah an tar tur a ni lova, intawhkhawmna vantlang inkhawm emaw kawngzawh emaw an huaihawt dawnin District hotu tarlan te bakah bialtu Police hotute an hriattirin phalna an la hmasa tur a ni .

Aizawl Municipal Council hnuaia Local Council pathum - II/1- Chaltlang, IX/3- Chhinga Veng leh XIII/3-Kanan Veng Local Council By Election neih tur atan hian 13th August, 2019 tlai dar 3 thlengin inthlan chuh tumtu ten Nomination an thehlut thei a, hengte hi 14th August 2019 ah Scrutiny neih ani anga, nomination thehlut in withdraw duhte tan 16th August 2019 tlai dar 3 thleng a theih ang.

Electoral Roll thar bera tarlan angin II/I-Chaltlang ah hian voter 4881 an awm a, IX/3- Chhinga Vengah ah hian voter 4932 awmin XIII/3-Kanan Veng ah hian voter 2770 an awm bawk a ni.