Vawiin khan Pu Lalrintluanga Sailo, Dampa bialtu MLA, Govt. Dy Chief Whip chuan a bial chhung Phuldungsei khua-ah, MZP Sub Headquarters, Phuldungsei buatsaih zirlai tithate chawimawina hun Phuldungsei Community Hall-a neih chu khuallian niin a hmanpui.

Khuallian chuan thu sawiin MZP-in lawmte lawmpuina leh chawimawina hun a buatsaih chu lawmawm a tih thu sawi a. Mamit District-ah Dampa bial chu Literacy a hniam bik avangin kan ram pumpui Literacy tihniamtu a ni mek bawk a. Nasa lehzuala tan kan lak sauh sauh a ngai a ni a ti.

Zirlai kalkhawmte chu an zirnaah theihtawp chhuah tur leh an theihna zawng zawnga zir a, an zirtirtute zahthiam turin a chah a. Zirtirtute pawh an zirlaite zah tura an invawn thianghlim a, tan an lak lehzual a beisei thu a sawi bawk.

Zirna chu kiltin atanga hmasawnna (all round development) a nih angin hnam dang kan chhevela dan anga hun rei tak ata lo awm tawh te lakah pawh hian kan ngaihtuahna te kan tihdanglam ve hret hret a tul thu sawiin Mizotawng Middle School Standard thleng thiam chu Sorkar hnathawkte phut kan nih angin, a bial chhunga mipui eng hnam pawh nise, Mizo tawng Middle School Standard thlenga an thiamna tur kawngah a bik takin Mizo khuate chu an pawimawh takzet a ni a ti.

Govt.Dy Chief Whip chuan thil ti ve theiha miin a inngaih chuan a ti thei a ni tiin a bial mipuite pawh Development hrang hrang kawng tha, tui leh Electric bakah zirna lama establishment-te pawh a tha ber ber kan phu ve a, chu chu kan beisei tur a ni, kan neih theih ngei nan theitawp kan chhuah tur a ni tiin kalkhawmte chu inphahniamna nun nei a, tanpui ngaite tanpui a, dikna leh rinawmna nen taima taka thawk thin turin a chah a ni.

L. Ramdinliana Renthlei, President, MZP General Hqrs pawhin zirlai tithate chawimawina hun hi hmanpuiin zirlaite fuihna thu tha tak tak a sawi a ni.

Vawiin zirlai tithate chawimawina hunah hian Graduate leh Post Graduate Pass thar mi 18-te chawimawina Citation hlan an ni a. Hei bakah hian School pahnih Cent percent Pass-te chawimawi an ni bawk.

Zirlai tithate chawimawina hun hi Pu C. Lalmalsawma, President, MZP Sub Hqrs, Phuldungsei chuan kaihruaiin Andrew C. Lalremdika, Secretary, MZP Sub Hqrs, Phuldungsei chuan Report tlangpui a pe a. Pu J. Lallianmawia, Adviser, MZP Sub Hqrs, Phuldungsei chuan lawmthu sawina a nei bawk.

Govt. Dy Chief Whip hi Pu H. Zonunsanga, AMC Councillor, Pu T.C Pachhunga, Ex MLA bakah Officials dangte'n an tawiawm a ni.